വടകര: ജപ സ്‌കൂള്‍ ഓഫ് മ്യൂസിക് സില്‍വര്‍ ജൂബിലി ആഘോഷത്തിന്റെ ഭാഗമായി സംഘടിപ്പിക്കുന്ന നവരാത്രി സംഗീതോത്സവം നാളെ മുതല്‍ 11 വരെ വിവിധ കേന്ദ്രങ്ങളിലായി നടക്കുമെന്നു ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
നാളെ വൈകിട്ട് മടപ്പള്ളി ജപ ഓഡിറ്റോറിയത്തില്‍ നടക്കുന്ന സംഗീതോത്സവം ഒഞ്ചിയം ഗ്രാമപഞ്ചായത്ത് പ്രസിഡന്റ് പി.വി കവിത ഉദ്ഘാടനം ചെയയ്യും. തുടര്‍ന്ന് മാഹി ആനവാതുക്കല്‍ ക്ഷേത്രത്തില്‍ ഉദ്ഘാടന കച്ചേരി നടക്കും. വരുംദിവസങ്ങളിലായി വ്യത്യസ്ത ക്ഷേത്രങ്ങളില്‍ സംഗീതകച്ചേരിയും പഞ്ചരത്‌ന കീര്‍ത്തനാലാപനവും നടക്കും. സില്‍വര്‍ ജൂബിലി ആഘോഷത്തിന്റെ സമാപനത്തോടനുബന്ധിച്ച് മുത്തുസ്വാമി ദീക്ഷിതര്‍ സംഗീതോത്സവം നടക്കും.
മാഹി ആനവാതുക്കല്‍ വേണുഗോപാല ക്ഷേത്രത്തില്‍ നടക്കുന്ന 12 മണിക്കൂര്‍ സംഗീതയജ്ഞം കോഴിക്കോട് മെഡിക്കല്‍ കോളജ് പ്രിന്‍സിപ്പല്‍ ഡോ. ശശിധരന്‍ ഉദ്ഘാടനം ചെയ്യുമെന്ന് ഭാരവാഹികള്‍ പറഞ്ഞു. വാര്‍ത്താസമ്മേളനത്തില്‍ ഡയറക്ടര്‍ യു. ജയന്‍ മാസ്റ്റര്‍, അഡ്വ. ഇ. നാരായണന്‍ നായര്‍, എ. പ്രേംകുമാര്‍, വിജീഷ് മേപ്പയില്‍, ശ്രീശന്‍ കാവില്‍ പങ്കെടുത്തു.