പട്ടിക്കാട്: യോഗക്ഷേമസഭ ജില്ലാ കമ്മിറ്റി സംഘടിപ്പിക്കുന്ന 'മഞ്ചീരം 2016' ദ്വിദിന ജില്ലാതല കലാമേളക്ക് ഇന്നു തുടക്കമാകും. തച്ചിങ്ങനാടം കൃഷ്ണാ യു.പി സ്‌കൂളിലാണു പരിപാടി നടക്കുന്നത്. രാവിലെ ഒന്‍പതിനു ജില്ലാ പ്രസിഡന്റ് കരിങ്ങനേഴി രാമന്‍ നമ്പൂതിരി പതാക ഉയര്‍ത്തും. തുടര്‍ന്നു രചനാ മത്സരങ്ങളും ഉച്ചയ്ക്കു ശേഷം സ്റ്റേജ് മത്സരങ്ങളും നടക്കും.
രണ്ടാംദിവസമായ നാളെ രാവിലെ ഒന്‍പതിനു നാഗകീര്‍ത്തി പുരസ്‌കാര ജേതാവ് മേലേടം കൃഷ്ണന്‍ നമ്പൂതിരിയെയും പൂന്താനം ഉപസഭയിലെ മുതിര്‍ന്ന അംഗമായ ചേലപ്പറമ്പ് വാമനന്‍ നമ്പൂതിരിയെയും ആദരിക്കും. തുടര്‍ന്നു നാലു വേദികളില്‍ ഇരുന്നൂറോളം കലാകാരന്മാര്‍ മാറ്റുരയ്ക്കുന്ന വിവിധ കലാപരിപാടികള്‍ നടക്കും.
വൈകിട്ട് അഞ്ചിനു നടക്കുന്ന സമാപന സമ്മേളനം കീഴാറ്റൂര്‍ പഞ്ചായത്ത് പ്രസിഡന്റ് പ്രസീത മണിയാണി ഉദ്ഘാടനം ചെയ്യും. കഥകളി സംഗീതജ്ഞന്‍ പാലനാട് ദിവാകരന്‍ നമ്പൂതിരി, സംസ്ഥാന പ്രസിഡന്റ് കൃഷ്ണന്‍ കാരക്കാട് സംബന്ധിക്കുമെന്നു ഭാരവാഹികള്‍ അറിയിച്ചു.