കശ്മിര്‍; ജമ്മുകശ്മിരിലെ ബാരമുള്ളയില്‍  സൈനികരുമായി ഭീകരര്‍ ഏറ്റുമുട്ടി. ഒരു സൈനികന്‍ കൊല്ലപ്പെടുകയും നാല് സൈനികര്‍ക്ക് പരിക്കേല്‍ക്കുകയും ചെയ്തു.രണ്ടു മണിക്കൂറോളം ഭീകരരും സൈന്യവുമായി ഏറ്റുമുട്ടലുണ്ടായി.

രണ്ട്  ഭീകരരെ സൈന്യം വധിച്ചു, ഭീകരരുടെ സംഘത്തില്‍ ഏഴ് പേരുണ്ടെന്നാണ് സൂചനയുണ്ട്. ബാരമുള്ളയിലെ സൈനിക കേന്ദ്രത്തിന് സമീപമാണ് ശക്തമായ ഏറ്റുമുട്ടല്‍ ഉണ്ടായിരിക്കുന്നത്. ഞായറാഴ്ച രാത്രി 10 30 നാണ് ഏറ്റുമുട്ടല്‍ തുടങ്ങിയത്.

അതേസമയം, ഇപ്പോള്‍ സ്ഥിതി നിയന്ത്രണ വിധേയമെന്ന് സൈന്യത്തിന്റെ വടക്കന്‍ കമാന്‍ഡര്‍ അറിയിച്ചു. ഭീകരര്‍ക്കായി തെരച്ചില്‍ തുടരുകയാണ്.  ഉറി ഭീകരാക്രമണത്തിന്റെയും ഇന്ത്യന്‍ സൈനിക തിരിച്ചടിയുടെയും പശ്ചാത്തലത്തില്‍ അതിര്‍ത്തിയിലുടനീളം ശക്തമായ ജാഗ്രതാ നിര്‍ദേശം നല്‍കിയിരുന്നെങ്കിലും ഇത് മറികടന്നാണ് ഭീകരര്‍ ആക്രമണം നടത്തിയത്.

സമീപത്തെ പാര്‍ക്കിലൂടെയാണ് ഭീകരര്‍ പ്രദേശത്തേക്ക് കടന്നത്.  46 രാഷ്ട്രീയ റൈഫിള്‍സിന്റെ ക്യാമ്പാണ് ബാരമുള്ളയിലുള്ളത്. ക്യാമ്പിലേക്ക് ഗ്രനേഡ് എറിഞ്ഞ ശേഷമായിരുന്നു ക്യാമ്പിലേക്ക് ഭീകരര്‍ നുഴഞ്ഞുകയറാന്‍ ശ്രമിച്ചത്. എന്നാല്‍ ആക്രമണം നടത്തിയെങ്കിലും ഒരു ഭീകരര്‍ക്ക് പോലും നുഴഞ്ഞ് കയറാനായിട്ടില്ലെന്ന് റിപ്പോര്‍ട്ടുകള്‍ പറയുന്നു.