കൊല്ലം: ആയൂരിനു സമീപം മീയണ്ണൂരില്‍ ഓട്ടത്തിനിടെ നിയന്ത്രണംവിട്ടകാര്‍ ബൈക്കുകളിലിടിച്ചശേഷം സമീപത്തെ മതിലും തകര്‍ത്തു. കഴിഞ്ഞദിവസം വൈകിട്ട് കൊട്ടറ ക്ഷീരോല്‍പാദകസംഘത്തിന് സമീപമായിരുന്നു സംഭവം. പൂയപ്പള്ളയില്‍ നിന്നും മീയണ്ണൂര്‍ ഭാഗത്തേക്ക് പോവുകയായിരുന്ന കാര്‍ നിയന്ത്രണംവിട്ട് വലതുവശത്തെ പാല്‍സൊസൈറ്റിയ്ക്ക് മുന്നില്‍ പാര്‍ക്ക് ചെയ്തിരുന്ന രണ്ട് ബൈക്കുകളും ഇടിച്ച് തെറിപ്പിച്ചശേഷം സമീപത്തെ മതിലില്‍ ഇടിച്ചുനില്‍ക്കുകയായിരുന്നു.

സംഭവസമയം എതിര്‍ദിശയില്‍ മറ്റ് വാഹനങ്ങള്‍ വരാതിരുന്നതിനാലും പാല്‍ സൊസൈറ്റിയ്ക്ക് മുന്നിലുണ്ടായിരുന്നവര്‍ ഓടിമാറിയതിനാലും വലിയ ദുരന്തം ഒഴിവായി. നെല്ലില സ്വദേശികളായ ഒരു കുടുംബം സഞ്ചരിച്ച കാറാണ് അപകടത്തില്‍പെട്ടത്. കാറിലുണ്ടായിരുന്ന യാത്രക്കാരെല്ലാം പരുക്കേല്‍ക്കാതെ രക്ഷപെട്ടു. പൂയപ്പള്ളി പൊലീസ് സ്ഥലത്തെത്തി മേല്‍നടപടികള്‍ സ്വീകരിച്ചശേഷം കേസ് രജിസ്റ്റര്‍ ചെയ്തു