കണ്ണൂര്‍: കണ്‍സ്യൂമര്‍ കാര്‍ഡുകള്‍ വഴി കച്ചവടം കൊഴുപ്പിക്കുന്ന സൂപ്പര്‍മാര്‍ക്കറ്റുകളില്‍ രാപ്പകല്‍ ജോലി ചെയ്യിച്ച് ജീവനക്കാരികളെ പിഴിയുന്നു. ജില്ലയില്‍ ചെറുനഗരങ്ങളില്‍പ്പോലും കൂണുപോലെ മുളച്ചുപൊന്തുന്ന സൂപ്പര്‍മാര്‍ക്കറ്റുകളിലെ തൊഴില്‍ ചൂഷണം അധികൃതര്‍ കണ്ടില്ലെന്നു നടിക്കുകയാണ്. യുവതികളാണ് ഇവിടങ്ങളില്‍ ജോലിചെയ്യുന്നവരില്‍ ഭൂരിഭാഗവും. ഒരുദിവസം 133 രൂപ പ്രകാരം നാലായിരം രൂപയ്ക്കാണ് മിക്കവരും ജോലിചെയ്യേണ്ടത്. രാവിലെ ഒന്‍പതു മുതല്‍ രാത്രി എട്ടുമണിവരെ ജോലിചെയ്യുന്നവരുണ്ട്. ഉത്സവകാലങ്ങളില്‍ ഇതിലേറെ സമയംവരും. സൂപ്പര്‍മാര്‍ക്കറ്റ് ഉടമകള്‍ നിശ്ചയിക്കുന്നതാണ് ശമ്പളം. അവധിയെടുത്താല്‍ ശമ്പളത്തില്‍ നിന്നു ആ ദിവസങ്ങളിലെ വേതനം കുറയ്ക്കും. പഞ്ചിങ് സംവിധാനം മിക്കയിടത്തുമുണ്ട്. ഉച്ചഭക്ഷണത്തിനായി അരമണിക്കൂറാണ് സമയം അനുവദിക്കുന്നത്. കാഷ്യര്‍ സീറ്റിലൊഴികെ മറ്റാര്‍ക്കും ഇരിക്കാനുള്ള സൗകര്യമില്ല. ചെറിയ പിഴവുകള്‍ക്കു പോലും കഠിനമായ ശകാരവും കേള്‍ക്കേണ്ടിവരും. ഇന്നത്തെ നിലയില്‍ ഒരു നല്ല സാരി  പോലും വാങ്ങാന്‍ ശമ്പളം കൊണ്ടുകഴിയില്ലെന്നു നഗരത്തിലെ ഒരു സൂപ്പര്‍ മാര്‍ക്കറ്റ് ജീവനക്കാരി പറയുന്നു. ബിരുദാനന്തരബിരുദം നേടിയവര്‍പോലും സൂപ്പര്‍മാര്‍ക്കറ്റുകളില്‍ ജോലി ചെയ്യുന്നുണ്ട്. തൊഴിലുറപ്പ് പദ്ധതിക്കുവരെ 250 രൂപ പ്രതിദിനം കൂലികൊടുക്കുമ്പോള്‍ കൊള്ളലാഭമുണ്ടാക്കാന്‍ ജീവനക്കാരെ കൊടും ചൂഷണത്തിനിരയാക്കുന്ന സൂപ്പര്‍മാര്‍ക്കറ്റുകളില്‍ ലേബര്‍ ഓഫിസറൊ തൊഴിലാളി യൂനിയനുകളോ പേരിനുപോലും തിരിഞ്ഞുനോക്കുന്നില്ല.