തിരുവനന്തപുരം: കെ.എസ്.ആര്‍.ടി.സിയുടെ രാത്രികാല സര്‍വീസുകള്‍ മുന്നറിയിപ്പില്ലാതെ റദ്ദാക്കുന്നത് യാത്രക്കാരെ വലക്കുന്നു. കിഴക്കേകോട്ടയില്‍ നിന്നും രാത്രി 10.30 ന് പുറപ്പെടുന്ന ബാലരാമപുരം, പുന്നമൂട്, വെള്ളായണി സര്‍വീസുകള്‍ പതിവായി റദ്ദാക്കുകയാണെന്നു യാത്രക്കാര്‍ പറയുന്നു. ദിവസങ്ങള്‍ക്ക് മുമ്പ് പുന്നമൂട് സര്‍വീസില്ലാത്തതിന്റെ പേരില്‍ കിഴക്കേകോട്ട സ്റ്റാന്റില്‍ യാത്രക്കാര്‍ ബഹളം വച്ചു. ഇത് ചോദ്യം ചെയ്യാന്‍ ജീവനക്കാര്‍ രംഗത്തെത്തിയതോടെ സംഘര്‍ഷാവസ്ഥയായി. തുടര്‍ന്നു പൊലിസ് നടത്തിയ ചര്‍ച്ചയെ തുടര്‍ന്നു അധികൃതര്‍ സര്‍വീസ് നടത്താന്‍ തീരുമാനിക്കുകയായിരുന്നു. നൂറു കണക്കിനു പേരാണ് ഈ രാത്രി സര്‍വീസുകളെ ആശ്രയിക്കുന്നത്. അപ്രതീക്ഷിതമായി സര്‍വീസുകള്‍ റദ്ദാക്കുന്നത് സര്‍വീസുകള്‍ മുടങ്ങാതിരിക്കാന്‍ വേണ്ട നടപടി സ്വീകരിക്കണമെന്നാവശ്യപ്പെട്ടു വിവിധ റസിഡന്‍സ് അസോസിയേഷനുകള്‍ കെ.എസ്.ആര്‍.ടി.സി മേധാവിയെ കണ്ടിരുന്നു. വേണ്ട പരിഹാരം ഉണ്ടാകുമെന്നും ഉറപ്പ് നല്‍കിയെങ്കിലും ഫലം കണ്ടില്ല.