ചുങ്കത്തറ: വിദ്യാര്‍ഥിനിക്ക് ബാങ്ക് വായ്പ നിഷേധിച്ചതായി പരാതി. ചുങ്കത്തറ എരുമമുണ്ട പുത്തന്‍പുരക്കല്‍ ബിജിമോളാണ് ജില്ലാ കലക്ടര്‍ക്ക് എടക്കര കനറാ ബാങ്കിനെതിരെ പരാതി നല്‍കിയിരിക്കുന്നത്. കര്‍ണാടകയില്‍ ബി.എസ്.സി നഴ്‌സിങ്ങിന് പ്രവേശം ലഭിച്ച മകള്‍ക്ക് വിദ്യാഭ്യാസ വായ്പ പൂര്‍ണമായി നല്‍കാനാവില്ലെന്ന് അറിയിച്ച് വായ്പ നിഷേധിക്കുകയായിരുന്നുവെന്ന് പരാതിയില്‍ പറയുന്നു. ലീഡ് ബാങ്കുകള്‍ വിദ്യാഭ്യാസ വായ്പ നല്‍കണമെന്ന നിര്‍ദേശമുള്ളതിനാലാണ് ആഗസ്ത് 31ന് മകള്‍ക്ക് ബി.എസ്.സി നഴ്‌സിംഗിന് വേണ്ടി എടക്കര ബ്രാഞ്ചില്‍ നാലു ലക്ഷം രൂപയുടെ വിദ്യാഭ്യാസ വായ്പക്ക് അപേക്ഷ നല്‍കിയത്. എന്നാല്‍ 7,000 രൂപ മാത്രം ശമ്പളം ലഭിക്കുന്ന നഴ്‌സുമാരില്‍ നിന്നു തിരിച്ചടവ് കിട്ടുന്നില്ലെന്ന കാരണം കാണിച്ച് ഒന്നര ലക്ഷം രൂപ മാത്രമേ അനുവദിക്കാനാകൂയെന്ന മറുപടിയാണ് ബാങ്കില്‍ നിന്നും അറിയിച്ചതെന്ന് ഇവര്‍ പരാതിയില്‍ പറയുന്നു.
ബി.എസ്.സി നഴ്‌സുമാരുടെ കുറഞ്ഞ ശമ്പളം 20,000 രൂപയാക്കി കേന്ദ്രസര്‍ക്കാര്‍ വര്‍ധിപ്പിച്ചത് ബാങ്ക് അധികൃതര്‍ കണ്ടില്ലെന്നു നടിക്കുകയാണ്. ക്യാന്‍സര്‍ ബാധിച്ച് ഭര്‍ത്താവ് മരണപ്പെട്ടതിനാല്‍ ഏക ആശ്രയം മകളാണെന്നും കൂടുതല്‍ ഫീസ് നല്‍കി പഠിപ്പിക്കുവാന്‍ തനിക്ക് കഴിയില്ലെന്നും നടപടി കൈകൊള്ളണമെന്നും ബിജിമോള്‍ പരാതിയില്‍ പറയുന്നു. ഈ മാസം നാലിന് ക്ലാസ് ആരംഭിച്ചിരിക്കെ വിദ്യാഭ്യാസ വായ്പ നിഷേധിച്ചത് പഠനത്തെ സാരമായി ബാധിക്കുമെന്നും ഇവര്‍ പറയുന്നു. അതേസമയം ഇത്രയും തുക വായ്പ അനുവദിക്കുന്ന കാര്യം ഹെഡ് ഓഫിസില്‍ അറിയിച്ചിട്ടുണ്ടെന്നും തീരുമാനം വരുന്ന മുറയ്‌ക്കേ നടപടിയെടുക്കാനാവൂ എന്നുമാണ് ബാങ്ക് അധികൃതരുടെ മറുപടി.