കല്യാശേരി : കല്യാശേരി സെന്‍ട്രലില്‍ വിദ്യാര്‍ഥിക്ക് നേരെ അക്രമം. മോറാഴ ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥി കല്യാശേരി സെന്‍ട്രലിലെ വൈഷ്ണവ്(14)നാണ് പരുക്കേറ്റത്.തിങ്കളാഴ്ച രാത്രി ഒമ്പതിനാണ് ബൈക്കിലെത്തിയ സംഘം ആക്രമിച്ചതെന്ന് പറയുന്നു. പാറക്കടവില്‍ സംഘടിപ്പിച്ച എല്‍.ഡി.എഫ് കല്യാശേരി ഈസ്റ്റ്‌വെസ്റ്റ് ലോക്കല്‍ റാലിയിലും കെ.പി.ആര്‍ രയരപ്പന്റെ അനുസ്മരണ റാലിയിലും പങ്കെടുത്ത് വീട്ടിലേക്ക് മടങ്ങുന്നതിനിടെയാണ് അക്രമം. ബഹളം കേട്ട് ഓടിയെത്തിയ നാട്ടുകാരാണ് വൈഷ്ണവിനെ കണ്ണൂര്‍ എ.കെ.ജി ആശുപത്രിയിലെത്തിച്ചത്. സംഭവത്തിന് പിന്നില്‍ ആര്‍.എസ്.എസ് പ്രവര്‍ത്തകരാണെന്ന് സി.പി.എം ആരോപിച്ചു.