കോഴിക്കോട്: ഹര്‍ത്താല്‍ ദിനത്തില്‍ യാത്രക്കാര്‍ക്ക് ആശ്വാസമായി റെയില്‍വേ സ്റ്റേഷനില്‍ സൗജന്യ വാഹനമൊരുക്കി കോഴിക്കോട് സിറ്റി പൊലിസ്. കേരളത്തിന്റെ വിവിധ ഭാഗങ്ങളില്‍ നിന്നും, മുംബൈയടക്കമുള്ള ദൂരെ സ്ഥലങ്ങളില്‍ നിന്നുമെത്തിയ യാത്രക്കാര്‍ക്കാണ് പൊലിസുകാര്‍ ഏര്‍പ്പെടുത്തിയ വാഹന സൗകര്യം പ്രയോജനമായത്.
പുതിയ ബസ്സ്റ്റാന്‍ഡ്, കെ.എസ്.ആര്‍.ടി.സി, മെഡിക്കല്‍ കോളജ്, മലാപ്പറമ്പ്, എരിഞ്ഞിപ്പാലം തുടങ്ങി ജില്ലയുടെ വിവിധ ഭാഗങ്ങളിലേക്കു സൗജന്യ സര്‍വിസ് നടത്തിയ  പൊലിസ് ബസ് രാവിലെ ആറു മുതല്‍ വൈകിട്ട് ആറു വരെയാണ് ഓട്ടം തുടര്‍ന്നത്. ഹര്‍ത്താല്‍ അറിയാതെ സ്‌റ്റേഷനിലെത്തി ഓട്ടോറിക്ഷ പോലും കിട്ടാതെ കുടുങ്ങിക്കിടന്ന വൃദ്ധകളും കുട്ടികളുമടങ്ങിയ യാത്രക്കാര്‍ക്ക് ഈ സര്‍വിസ് ഏറെ ഉപകാരപ്രദമായി.