തേഞ്ഞിപ്പലം: റോഡരികില്‍ പൊന്തക്കാടുകള്‍ നിറഞ്ഞ് നില്‍ക്കുന്നത് ഡ്രൈവര്‍മാരുടെ കാഴ്ച മറക്കുന്നു. ചേളാരി- കൂട്ടുമൂച്ചി റോഡില്‍ പൊറ്റമ്മല്‍ ഭാഗത്താണ് റോഡരികില്‍ ഒരാളുടെ ഉയരത്തില്‍ പുല്‍കാടുകള്‍ ഉയര്‍ന്ന് നില്‍ക്കുന്നത്.
എതിര്‍ദിശയില്‍ നിന്നുവരുന്ന വാഹനങ്ങള്‍ കാണാന്‍ കഴിയാത്ത വിധം കാടുവളര്‍ന്നത് അപകടഭീഷണിയിലാണ്. റോഡിന്റെ വളവും അപകടസാധ്യത വര്‍ധിപ്പിക്കുന്നു.
ബൈക്ക്, കാര്‍, ഓട്ടോറിക്ഷ തുടങ്ങിയ ഉയരക്കുറവുള്ള വാഹനങ്ങള്‍ക്കാണിത് ഏറെ ഭീഷണിയാകുന്നത്. മാത്രമല്ല, റോഡിന്റെ ഒരു വശത്ത് വയലാണ്. സൂചനയായി റോഡിന്റെ ഇരുവശങ്ങളിലുമായി സ്ഥാപിച്ച തൂണുകളില്‍ ഘടിപ്പിച്ച റിഫ്‌ളക്ടറുകള്‍ പുല്‍ക്കാടില്‍ മൂടിയതിനാല്‍ രാത്രികാല യാത്രയും പ്രയാസമാകുകയാണ്.