മരട്: നെട്ടൂര്‍ മേഖല റസിഡന്റ്‌സ് അസോസിയേഷന്റെ ആഭിമുഖ്യത്തില്‍ പ്രതിഷേധ മാര്‍ച്ചും നഗരസഭ ഓഫിസിസ് മുമ്പില്‍ ധര്‍ണ്ണയും നടത്തി. നെട്ടൂരിലെ തെരുവ് നായ ശല്യത്തിന് പരിഹാരം കാണുക, നെട്ടൂര്‍ തേവര ഫെറി ബോട്ട് സര്‍വീസ് പുനരാരംഭിക്കുന്നതിന് നടപടി സ്വീകരിക്കുക, പ്രിയദര്‍ശിനി ബോട്ട് വാങ്ങിയതിലെ അഴിമതി അന്യേഷിക്കുക എന്നീ ആവശ്യങ്ങളുന്നയിച്ചാണ് പ്രതിഷേധ സമരം നടത്തിയത്.
നെട്ടൂര്‍ പ്രദേശത്ത് തെരുവ് നായ ശല്യം രൂക്ഷമാവുകയാണ്. ഇവയുടെ ആക്രമണത്തില്‍ നിരവധി പേര്‍ക്ക് പരിക്കേറ്റിട്ടുണ്ട്. വളര്‍ത്ത മൃഗങ്ങളും ആക്രമണത്തിന് ഇരയാവുകയാണ്. നഗരസഭ ഒരുനടപടിയും സ്വീകരിക്കാത്തതിനാല്‍ പ്രതിഷേധം ശക്തമാക്കുമെന്ന് അസോസിയേഷന്‍ ഭാരവാഹികള്‍ പറഞ്ഞു.
രണ്ടാഴ്ചയിലേറെയായി നെട്ടൂര്‍ തേവര ഫെറി ബോട്ട് സര്‍വീസ് മുടങ്ങിയത് മൂലം പ്രദേശവാസികള്‍ ബുദ്ധിമുട്ടിലാണ്. ഇരുപത്തേഴ് ലക്ഷം രൂപ ചിലവഴിച്ച് നിര്‍മ്മിച്ച ബോട്ട് യന്ത്രത്തകരാറുമൂലം സര്‍വ്വീസ് മുടങ്ങുന്നത് പതിവായിരിക്കുന്നു.
ബോട്ട് നിര്‍മിച്ച് നല്‍കിയ കെ.എസ്.ഐ.എന്‍.സിയും നഗരസഭയും പരസ്പരം പഴിചാരിയുള്ള ശീതസമരം പ്രശ്‌ന പരിഹാരത്തിന് തടസ്സമാവുകയാണ്. ബോട്ട് വാങ്ങിയതിലെ അഴിമതി അന്യേഷിക്കണമെന്നും അസോസിയേഷന്‍ ആവശ്യപ്പെട്ടു.
ധര്‍ണ്ണയില്‍ മന്‍സൂര്‍ അഹമ്മദ്, സി.ബി. മഹേശന്‍, ഡോ.പി.എം.ഫസല്‍, എന്‍.കെ അബ്ദുള്‍ മജീദ് വി.എ.സാദിക്, സുമംഗല അരവിന്ദ്, ലോഹിതാക്ഷന്‍, കെ.പി. പുഷന്‍, എം.എ.അബ്ദു, എന്നിവര്‍ പ്രസംഗിച്ചു. തുടര്‍ന്ന് അസോസിയേഷന്‍ ഭാരവാഹികള്‍ നഗരസഭ ചെയര്‍പേഴ്‌സനും സെക്രട്ടറിക്കും നിവേദനം നല്‍കി.