മലയിന്‍കീഴ്: മദ്യ ലഹരിയില്‍ വാഹനമോടിച്ച് ഭീകരാന്തരീക്ഷം സൃഷ്ടിച്ചയാളെ നാട്ടുകാര്‍ പിടികൂടി പൊലിസിലേല്‍പ്പിച്ചു. കുമാരപുരം ടി.സി. 11927 എല്‍.എച്ച്.ആര്‍.എസ്.എ 20ല്‍ രാധാകൃഷ്ണനാണ് (56) പിടിയിലായത്. ഇന്നലെ വൈകിട്ട് ചീനിവിള ഭാഗത്ത് നിന്ന് മലയിന്‍കീഴിലേക്ക് വന്ന സാന്റട്രോ കാറാണ് ജനത്തെ ഏറെ നേരം മുള്‍മുനയില്‍ നിറുത്തിയത്.
പിന്നീട് നാട്ടുകാര്‍ കാറിനെ പിന്തുടര്‍ന്ന് പ്ലാങ്കാലമുക്കിന് സമീപത്ത് വച്ച് തടഞ്ഞിട്ടു. പൊലിസെത്തി രാധാകൃഷ്ണനെ കസ്റ്റഡിയിലെടുത്തു. കാര്‍ പൊലിസ് വാഹനത്തില്‍ കെട്ടി വലിച്ചാണ് സ്‌റ്റേഷനിലെത്തിച്ചത്. കാറിന്റെ മുന്‍വശത്തെ ടയര്‍ പൊട്ടിയ നിലയിലാണ്. വീല്‍ ഡിസ്‌ക് റോഡിലിടിച്ച് വലിയ ശബ്ദത്തോടെയായിരുന്നു കാര്‍ പോയതെന്നും നാട്ടുകാര്‍ പറഞ്ഞു. എതിരെ വന്ന വാഹനങ്ങള്‍ ഒഴിഞ്ഞു മാറിയതിനാല്‍ വന്‍ അപകടം ഒഴിവായി. പൊലിസ് കേസെടുത്തു.