തളിപ്പറമ്പ്: ഭക്ഷ്യസുരക്ഷാ പദ്ധതി നടപ്പിലാക്കിയാല്‍ മാത്രമേ അരി നല്‍കുകയുള്ളൂ എന്ന കേന്ദ്ര സര്‍ക്കാറിന്റെ പിടിവാശിയാണു ജില്ലയില്‍ റേഷനരിവിതരണം സ്തംഭിക്കാന്‍ കാരണമെന്ന് ആള്‍ കേരളാ റേഷന്‍ ഡീലേഴ്‌സ് അസോസിയേഷന്‍ ജില്ലാ കമ്മിറ്റി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. എ.പി.എല്‍ സബ്‌സിഡി വിഭാഗത്തിനു വിതരണം ചെയ്യേണ്ട അരി ഇതുവരെയായി എഫ്.സി.ഐ ഗോഡൗണില്‍ നിന്നു മൊത്തവ്യാപാരികള്‍ക്കു വിട്ടുകൊടുത്തിട്ടില്ല. അതുകൊണ്ടുതന്നെ ഈ വിഭാഗക്കാര്‍ക്ക് അരി വിതരണം ചെയ്യാന്‍ സാധിച്ചിട്ടില്ല. കേന്ദ്ര സര്‍ക്കാര്‍ അരിയുടെ സബ്‌സിഡി നിര്‍ത്തലാക്കിയതിനാല്‍ എത്ര രൂപയ്ക്കാണ് അരി വിതരണം ചെയ്യേണ്ടതെന്നു പറയാന്‍ ഉദ്യോഗസ്ഥര്‍ക്കു സാധിക്കുന്നില്ല. അതുകൊണ്ടാണു റേഷന്‍ കടകളില്‍ സ്റ്റോക്കുള്ള അരി പോലും റേഷന്‍കാര്‍ഡുടമകള്‍ക്ക് നല്‍കാന്‍ സാധിക്കാത്തത്.
    പ്രശ്‌നങ്ങള്‍ക്ക് എത്രയും പെട്ടെന്നു പരിഹാരമുണ്ടാക്കണമെന്നും വെട്ടിക്കുറച്ച സബ്‌സിഡി പുനഃസ്ഥാപിക്കണമെന്നും മുഴുവന്‍ കാര്‍ഡുടമകള്‍ക്കും അരി വിതരണം ചെയ്യണമെന്നും ആവശ്യപ്പെട്ട് റേഷന്‍ വ്യാപാരികള്‍ ശക്തമായ സമരത്തിന് ഒരുങ്ങുകയാണ്.
ഇതിന്റെ ഭാഗമായി 24 ന് കേരളത്തിലെ മുഴുവന്‍ റേഷന്‍കടകളും അടച്ചിട്ട് നിയമസഭാ മാര്‍ച്ച് നടത്തും. കണ്ണൂരിലെ എല്ലാ റേഷന്‍ വ്യാപാരികളും സമരത്തില്‍ പങ്കെടുക്കുമെന്ന് ജില്ലാ പ്രസിഡന്റ് ബി.സഹദേവന്‍, സെക്രട്ടറി ടി.കെ.ആരിഫ്, എന്‍.സുരേന്ദ്രന്‍, എം.എ.മുസ്തഫ, പി.ഭാര്‍ഗവന്‍ എന്നിവര്‍ അറിയിച്ചു