കൊണ്ടോട്ടി: ഉണര്‍വ് കൃഷി പദ്ധതിയുടെ ഭാഗമായി നഗരസഭയുടെ അധീനതയിലുളള തരിശുഭൂമിയില്‍ നെല്‍കൃഷിയിറക്കി കൊണ്ടോട്ടി നഗരസഭ കൗണ്‍സിലര്‍മാര്‍ മാതൃകയായി. കൊണ്ടോട്ടി നഗരസഭയോടു ചേര്‍ന്നുളള മുന്‍വശത്തെ ഒഴിഞ്ഞ വയലിലാണു നഗരസഭ നെല്‍കൃഷി തുടങ്ങിയത്.
മേഖലയില്‍ തരിശു പ്രദേശങ്ങള്‍ കണ്ടെത്തി കൃഷിയോഗ്യമാക്കണമെന്നു സ്ഥലം എം.എല്‍.എ ടി.വി.ഇബ്രാഹിമിന്റെ നേതൃത്വത്തില്‍ ചേര്‍ന്ന യോഗത്തില്‍ തീരുമാനിച്ചിരുന്നു.നഗരസഭയ്ക്കു കീഴില്‍ കൃഷിയെ പ്രോല്‍സാഹിപ്പിക്കുക, മറ്റുളളവരെ കൃഷിയിലേക്കു പ്രാപ്തരാക്കുക എന്ന ലക്ഷ്യത്തോടു കൂടിയാണു നഗരസഭ അംഗങ്ങള്‍ മുന്‍കൈ എടുത്തു കൃഷിക്കിറങ്ങിയത്. ഒരേക്കറില്‍ അധികം വരുന്ന വയലില്‍ ഇന്നലെ ഞാറു നട്ടു.സമീപത്തെ കര്‍ഷകനാണു കൃഷി ഇറക്കാനായ ഞാറു നല്‍കിയത്. നഗരസഭ ചെയര്‍മാന്‍ സി.കെ.നാടിക്കുട്ടി, വൈസ് ചെയര്‍പേഴ്‌സണ്‍ കൂനയില്‍ നഫീസ, കൗണ്‍സിലര്‍മാരായ പാറപ്പുറം അബ്ദുറഹിമാന്‍, അഡ്വ.കെ.കെ.സമദ്, മുഹമ്മദ് ഷാ, പുലാശ്ശേരി മുസ്തഫ, പി.എ.അഹമ്മദ് കബീര്‍, സി.മുഹമ്മദ് റാഫി, ചുക്കാന്‍ ബിച്ചു, മുഹമ്മദ് ഷാ മാസ്റ്റര്‍, ഗീത, മിനി, സുലൈഖ, കൃഷി ഓഫിസര്‍ ബീന, സെക്രട്ടറി അനില്‍ തുടങ്ങി നിരവധി പേര്‍ പങ്കെടുത്തു.