കുന്ദമംഗലം: എന്‍.ഐ.ടി കാലിക്കറ്റിന്റെ ടെക്‌നോ മാനേജ്‌മെന്റ് ഫെസ്റ്റായ തത്വയ്ക്ക് തിരിതെളിഞ്ഞു. ഇന്നലെ നടന്ന ചടങ്ങില്‍ എല്‍.ആന്‍ഡ് ടി ചീഫ് എക്‌സിക്യൂട്ടീവ് ശ്രീകാന്ത് ജയിന്‍പൂര്‍ മുഖ്യാതിഥിയായി.
'തത്വ 16' ടൈറ്റില്‍ സ്‌പോണ്‍സറാണ് എല്‍.ആന്‍ഡ് ടി. എന്‍.ഐ.ടി ഡയറക്ടര്‍ ഡോ.ശിവജി ചക്രവര്‍ത്തി, രജിസ്ട്രാര്‍ കെ.പങ്കജാക്ഷന്‍,സ സ്റ്റുഡന്‍സ് അഫയേഴ്‌സ് ഡീന്‍ ഡോ. ജി. ഉണ്ണികൃഷ്ണന്‍,തത്വ ഫാക്കല്‍റ്റി കണ്‍വീനര്‍ ഡോ.എ സുജിത് ,ടെക്‌നിക്കല്‍ അഫേര്‍ സെക്രട്ടറി ശ്രീരാജ് എം,ജനറല്‍ സെക്രട്ടറി ഹാന്‍സ് എം ആന്റണി എന്നിവര്‍ സംസാരിച്ചു.
60ല്‍പരം മത്സര ഇനങ്ങളും, 20 ലക്ഷത്തിലധികം സമ്മാനത്തുകയുമായി,മൂന്ന് ദിവസങ്ങളിലായി നടത്തപ്പെടുന്ന തത്വ 16 ശാസ്ത്ര-സാങ്കേതികരംഗത്തെ പുത്തന്‍ അറിവുകള്‍ ജനങ്ങളുമായി പങ്കുവെയ്ക്കും. 'സാങ്കേതികതയുടെ പരിണാമം' പ്രമേയമാക്കിയ മേളയില്‍ ദക്ഷിണേന്ത്യയിലെ പ്രമുഖ എഞ്ചിനീയറിംഗ് കോളജുകളിലെ പ്രതിഭകള്‍ മാറ്റുരയ്ക്കും
വിവിധ ഡിപ്പാര്‍ട്‌മെന്റുകളിലെ വിദ്യാര്‍ഥികള്‍ ഒരുക്കുന്ന സ്റ്റാളുകള്‍, വിര്‍ച്വല്‍ റിയാലിറ്റി ,എത്തിക്കല്‍ ഹാക്കിങ്ങ്, ന്യൂറോ ലിംഗ്യുസ്റ്റിക്‌സ് തുടങ്ങിയ വൈവിധ്യമാര്‍ന്ന വര്‍ക്ക്‌ഷോപ്പുകള്‍, വാഹന പ്രേമികള്‍ക്ക് ഹരംപകരുന്ന വീല്‍സ് ഓട്ടോഷോ എന്നിവ മേളയുടെ ആകര്‍ഷണങ്ങളാണ്.
ഇതിനുപുറമെ എന്‍ക്വയര്‍ ക്വിസ് ക്ലബിന്റെ ആഭിമുഖ്യത്തില്‍ നടക്കുന്ന വിവിധ ക്വിസ് മത്സരങ്ങളും,റോബോട്ടിക്പ്രദര്‍ശനങ്ങളും തത്വയുടെ മാറ്റ്കൂട്ടും. 'നാവോ' എന്നറോബോട്ട് അവയില്‍ എടുത്തുപറയേണ്ടതാണ്.
ഇ-മെയിലിന്റെ നിര്‍മാതാവ് എന്ന നിലയില്‍ ലോക പ്രസിദ്ധനായ കംപ്യൂട്ടര്‍ ശാസ്ത്രജ്ഞന്‍ ശിവഅയ്യാദുരെ, പോഗോ ടി.വിയിലെ 'എഫ്.എ.ക്യു എയറിങ് ' എന്ന പരിപാടിയിലൂടെ വിഖ്യാതനായ പ്രതീക് സേഥി, ദി ഗ്രേറ്റ് ഇന്ത്യന്‍ ഒബ്‌സെഷന്‍' എന്ന പ്രസിദ്ധ പുസ്തകത്തിന്റെ രചയിതാവ് ആദിത്യ അയ്യര്‍,യുവ സംരംഭകന്‍ സാര്‍ഥക് സേഥി എന്നിവരുടെ സാന്നിദ്ധ്യം തത്വ 16നെ ശ്രദ്ധേയമാക്കുന്നു.
പ്രമുഖ ബാന്‍ഡ് 'വെന്‍ചായ്‌മെറ്റ്‌ടോസ്റ്റ്, ബോളിവുഡ് ഗായകന്‍ ആഷ്‌കിംഗ്, ഡി.ജെ സയന കാതറിന്‍ തുടങ്ങിയവര്‍ അവതരിപ്പിക്കന്ന 'പ്രോഷോ നൈറ്റ്‌സ്', തത്വയുടെ പ്രത്യേക ആകര്‍ഷണമാണ്. ഞായറാഴ്ച സമാപിക്കുന്ന മേള ഇന്ത്യയുടെ വിവിധ ഭാഗങ്ങളില്‍ നിന്നെത്തുന്ന ശാസ്ത്ര വിജ്ഞാനകൗതികകള്‍ക്ക് ആവേശംപകരുന്നതാകും.