കൊടുങ്ങല്ലൂര്‍: ദേശീയപാത പതിനേഴില്‍ നിയന്ത്രണം വിട്ട പിക്കപ്പ് വാന്‍ ടാങ്കര്‍ ലോറിയില്‍ ഇടിച്ച് രണ്ട് പേര്‍ക്ക് പരുക്കേറ്റു. മാനന്തവാടി മധുരക്കണ്ടി ഫിറോസ്(22), വയനാട് മുട്ടില്‍ അജ്മല്‍(21) എന്നിവര്‍ക്കാണ് പരുക്കേറ്റത്.
പരുക്കേറ്റ ഇരുവരെയും ടി.കെ.എസ് പുരം മെഡികെയര്‍ ആശുപത്രിയില്‍ പ്രവേശിപ്പിച്ചു. കോട്ടപ്പുറം-മൂത്തുകുന്നം പാലത്തിന് സമീപം ഇന്നലെ പുലര്‍ച്ചെ അഞ്ചിനായിരുന്നു അപകടം. എറണാകുളം വൈറ്റിലയിലെ റിക്കവറി സ്ഥാപനത്തിലെ ജീവനക്കാരായ ഇവര്‍ ഗുരുവായൂര്‍ ഭാഗത്തേക്ക് പിക്കപ്പ് വാനില്‍ ബൈക്കുകള്‍ കൊണ്ടുപോകുകയായിരുന്നു. പാലത്തില്‍ വെച്ച് കണ്ടെയ്‌നര്‍ ലോറിയെ മറികടക്കുന്നതിനിടയില്‍ ടാങ്കര്‍ ലോറി വരുന്നതുകണ്ട് വാന്‍ ബ്രേക്ക് പിടിച്ചെങ്കിലും തെറിച്ച് ടാങ്കര്‍ ലോറിയില്‍ ഇടിക്കുകയായിരുന്നു.
അപകട വിവരമറിഞ്ഞ് കൊടുങ്ങല്ലൂര്‍, പറവൂര്‍ എന്നിവിടങ്ങളില്‍ നിന്ന് ഫയര്‍ഫോഴ്‌സും, കൊടുങ്ങല്ലൂര്‍ കണ്‍ട്രോള്‍ റൂം പൊലിസും സ്ഥലത്ത് എത്തി വാഹനം വെട്ടി പൊളിച്ചാണ് ഇരുവരെയും പുറത്തെടുത്തത്.