അന്തിക്കാട്: വിരോധ പൂര്‍വം മുറ്റിച്ചൂര്‍ എ.എല്‍.പി സ്‌കൂളിന് വൈദ്യുതി ബില്‍ നല്‍കി എന്നാരോപിച്ച് ഫയല്‍ ചെയ്ത ഹര്‍ജിയില്‍ പരാതിക്കാരന് അനുകൂല വിധി. മുറ്റിച്ചൂര്‍ എ.എല്‍.പി സ്‌കൂളിലെ ഹെഡ് മാസ്റ്ററും മാനേജറുമായ ബൈജു ജോര്‍ജ്ജ് ഫയല്‍ ചെയ്ത ഹര്‍ജിയിലാണ് കെ.എസ്.ഇ.ബിയുടെ പെരിങ്ങോട്ടുകരയിലെ അസിസ്റ്റന്റ് എന്‍ജിനിയര്‍ക്കെതിരെയും തിരുവനന്തപുരത്തുള്ള സെക്രട്ടറിക്കെതിരെയും ഇപ്രകാരം വിധിയായത്. അനധികൃതമായി ലോഡ് ഉപയോഗിച്ചു എന്നാരോപിച്ചാണ് സ്‌കൂളിന് ബില്‍ നല്‍കുകയുണ്ടായത്. എന്നാല്‍ ഇത് ശരിയല്ലെന്ന് കാണിച്ച് സ്‌കൂള്‍ ഹെഡ് മാസ്റ്റര്‍ ഹര്‍ജി ഫയല്‍ ചെയ്യുകയായിരുന്നു. സ്‌കൂളിന്റെ സമീപത്തുള്ള പണിക്കവീട്ടില്‍ അബുവിന്റെ വീട്ടിലേക്ക് സര്‍വിസ് വയര്‍ സ്‌കൂളിന്റെ അനുവാദമില്ലാതെയായിരുന്നു വലിച്ചിരുന്നത്. ഇത് അപകടകരമാം വിധം വീണ് കിടക്കുകയും നിരന്തരം സ്‌കൂള്‍ അതികൃതര്‍ പരാതിപ്പെടുകയും ചെയ്തുകൊണ്ടിരുന്നു. ഇങ്ങനെ നിരന്തരം പരാതിപ്പെടുന്നതിലെ വൈരാഗ്യം കൊണ്ടാകാം ഇപ്രകാരം നിയമവിരുദ്ധ ബില്‍ നല്‍കിയതെന്നായിരുന്നു സ്‌കൂളിന്റെ വാദം. തെളിവുകള്‍ പരിഗണിച്ച് പ്രസിഡന്റ് പി.കെ ശശി, മെമ്പര്‍മാര്‍ വി.വി ഷീന, എം.പി ചന്ദ്രകുമാര്‍ എന്നിവരടങ്ങിയ തൃശൂര്‍ ഉപഭോക്തൃ കോടതി  സ്‌കൂളിന് നല്‍കിയ ബില്‍ റദ്ദ് ചെയ്യാന്‍ കല്‍പിച്ച് വിധി പുറപ്പെടുവിക്കുകയായിരുന്നു. ഹര്‍ജിക്കാരന് വേണ്ടി അഡ്വ. എ.ഡി ബെന്നി ഹാജരായി വാദം നടത്തി.