പെരിക്കല്ലൂര്‍: പപ്പായ അഥവാ കപ്ലം വയനാട്ടില്‍ വ്യാപകമാണ്. വീടുകളുടെ പരിസരത്ത് നന്നായി വളരുന്ന ഇവ പക്ഷെ ജനങ്ങള്‍ക്ക് ഉപകാരപ്പെടുന്നില്ല. വയനാട്ടിലെ ചക്കയും, മാങ്ങയും പോലെ ആരാലും ശ്രദ്ധിക്കപ്പെടാതെ പാഴായിപ്പോകുകയാണ് പപ്പായയും.
യാതൊരു സംരക്ഷണവുമില്ലാതെ സമൃദ്ധമായി വളരുന്ന പപ്പായകള്‍ വാങ്ങുവാനൊ വിപണനം നടത്തുവാനൊ ഇവിടെ സംവിധാനങ്ങളില്ല. ഏതു പച്ചക്കറിയുടെ കൂടെയും ഉപയോഗിക്കാവുന്ന പപ്പായകള്‍ പോഷകസമൃദ്ധവുമാണ്.
വയനാട്ടില്‍ പപ്പായകള്‍ അവഗണിക്കപ്പെടുമ്പോള്‍ കേരളാതിര്‍ത്തിയായ കര്‍ണാടകയിലെ ഗുണ്ടല്‍പ്പേട്ടയില്‍വരെ മലയാളികള്‍ ഇവ കൃഷിചെയ്ത് സാമ്പത്തികനേട്ടം ഉണ്ടാക്കുന്നുണ്ടെന്നതാണ് ഇതിലെ വൈചിത്ര്യം. വയനാട്ടിലെ കാലാവസ്ഥയില്‍ വളരെയേറെ ഫലം നല്‍കുന്ന പപ്പായകള്‍ കൃഷിചെയ്യുവാനും വിപണനം നടത്തുവാനുമുള്ള സംവിധാനം വേണമെന്നാണ് ജനങ്ങളുടെ ആവശ്യം.