മാറഞ്ചേരി: മാലിന്യമുക്ത സന്ദേശവുമായി വിദ്യാര്‍ഥികളുടെ ജലയാത്ര. അറവുമാലിന്യം തള്ളുന്നതുമൂലം മാലിന്യ കനാലായി മാറുന്ന കനോലികനാലിലൂടെയായിരുന്നു വിദ്യാര്‍ഥികളുടെ യാത്ര. വെളിയങ്കോട് ഗവ. ഹയര്‍ സെക്കന്‍ഡറി സ്‌കൂളില്‍ തിങ്കളാഴ്ച്ച ആരംഭിക്കുന്ന പൊന്നാനി ഉപജില്ലാ ശാസ്ത്ര മേളയുടെ  വിളംബരവുമായി ബന്ധപ്പെട്ടാണ് കനോലി കനാല്‍ വഴി  മാലിന്യമുക്തസന്ദേശ ജലയാത്ര നടത്തിയത്.  
വെളിയങ്കോട് പൂക്കൈതയില്‍ നിന്നാരംഭിച്ച ജലയാത്ര ഗ്രാമം ആനപ്പടിയില്‍ സമാപിച്ചു. വെളിയങ്കോട്  ഗ്രാമപ്പഞ്ചായത്ത് അംഗം റിയാസ് പഴഞ്ഞി വഞ്ചി തുഴഞ്ഞ്  ജലയാത്ര ഉദ്ഘാടനം ചെയ്തു.  
ശ്രീശേഷ്, ഫാറൂഖ് വെളിയങ്കോട്, സ്‌കൂള്‍ ചെയര്‍മാന്‍ ഷിബിലി സലാഹുദ്ദീന്‍, ലീഡര്‍ മുഹമ്മദ്  യാസീന്‍ എന്നിവര്‍ ജലയാത്രക്ക് നേതൃത്വം നല്‍കി.