വടക്കാഞ്ചേരി: സ്വന്തം മുടി മുറിച്ചു നല്‍കി ജീവകാരുണ്യ രംഗത്ത് ശ്രദ്ധേയമായൊരു അധ്യായം എഴുതി ചേര്‍ത്ത് മച്ചാട് സെന്റ് ആന്റണീസ് ദേവാലയം. സഹകരണ വകുപ്പ് മന്ത്രി എ.സി മൊയ്തീന്റെ ഭാര്യ ഉസൈബാ ബീവിയും മകള്‍ ആയുര്‍വേദ ഡോക്ടര്‍ ഷീബയും അടക്കം 215 വനിതകളാണ് കേശദാനം നടത്തി മാതൃക തീര്‍ത്തത്. ദേവാലയത്തിലെ പിയാത്ത പെയിന്‍ ആന്റ് പാലിയേറ്റീവ് കെയര്‍ യൂനിറ്റും മച്ചാട് ലവിംഗ് ലയണ്‍സ് ക്ലബും സംയുക്തമായാണ് കേശ ദാന പരിപാടി സംഘടിപ്പിച്ചത്. മുളങ്കുന്നത്തകാവ് മെഡിക്കല്‍ കോളജില്‍ പ്രവര്‍ത്തിക്കുന്ന ഹെയര്‍ ടു കെയറിലേക്കാണ് മുടി നല്‍കിയത്.
71 പേര്‍ക്ക് ഈ മുടി കൊണ്ട് വിഗ് നിര്‍മിച്ച് നല്‍കാനാകുമെന്ന് ഹെയര്‍ ടു കെയര്‍ പ്രോഗ്രാം കോര്‍ഡിനേറ്റര്‍ ഡോ: ശ്രീകുമാര്‍ അറിയിച്ചു. പഞ്ചായത്ത് പ്രസിഡന്റ് എം.കെ ശ്രീജയും മകളും സ്ഥിരം സമിതി അധ്യക്ഷ സുജാത ശ്രീനിവാസന്‍, പഞ്ചായത്ത് മെമ്പര്‍മാരായ രജനി, മുന്‍ ബ്ലോക്ക് പഞ്ചായത്ത് പ്രസിഡന്റ് എം.എസ് ഏല്യാമ ടീച്ചര്‍, ജില്ലാ പഞ്ചായത്ത് മെമ്പര്‍ മേരി തോമാസ്  എന്നിവരടമടക്കമുള്ള വനിതകളും കേശദാനം നടത്തി. 30 സെന്റിമീറ്റര്‍ നീളത്തിലാണ് യുവതികളും, വീട്ടമ്മമാരുമടക്കമുള്ള സംഘത്തിന്റെ മുടി മുറിച്ചെടുത്തത്. പഞ്ചായത്തിലെ വിവിധ ബ്യൂട്ടീഷ്യന്മാര്‍ നേതൃത്വം നല്‍കി. ഇടവക വികാരിയും സംഘാടക സമിതി ചെയര്‍മാനുമായ ഫാ.ഡോ.ബിജു ആലപ്പാട്ട്, ലവിംഗ് ലയണ്‍സ് പ്രസിഡന്റ് ഷാജു തോമാസ്, രക്ഷാധികാരികളായ ജില്ലാ പഞ്ചായത്ത് മെമ്പര്‍ മേരി തോമാസ്, ഡോ: രവീന്ദ്രന്‍ മൂര്‍ക്കനാട്ട്, വൈസ് ചെയര്‍മാന്മാരായ പി.ജെ രാജു, ബീന ജോണ്‍സണ്‍, സിസ്റ്റര്‍ വിയാനി, വര്‍ക്കിങ് ചെയര്‍മാന്‍ ഡെന്നി തോമാസ്, എന്നിവരടങ്ങുന്ന കമ്മിറ്റി മഹനീയ പ്രവര്‍ത്തനത്തിന് നേതൃത്വം നല്‍കി.
 കേശദാനം നടത്തിയ 215 വനിതകളും വിശിഷ്ട വ്യക്തികളും ചേര്‍ന്ന് അര്‍ബുധത്തെ അകറ്റുന്നതിന് വേണ്ടിയുള്ള സന്ദേശ മടങ്ങിയ വെള്ള ബലൂണുകള്‍ ഒന്നിച്ച് അന്തരീക്ഷത്തിലേക്ക് പറത്തിയാണ് ഉദ്ഘാടനം നടത്തിയത്. തുടര്‍ന്ന് വടക്കാഞ്ചേരി എം.എല്‍.എ അനില്‍ അക്കര, സീരിയല്‍ താരം സ്‌നേഹ, സാമൂഹ്യ പ്രവര്‍ത്തക ഷീബ അമീര്‍, എം.കെ ശ്രീജ, ഫാ: ഡോ: ബിജു ആലപ്പാട്ട്, മേരി തോമസ്, മറ്റ് ജനപ്രതിനിധികള്‍, സംസ്‌ക്കാരിക പ്രവര്‍ത്തകര്‍ എന്നിവര്‍ പങ്കെടുത്ത് സംസാരിച്ചു.