കാരാട്: പഞ്ചായത്ത് സ്‌കൂള്‍ കായികമേളയില്‍ പ്രതിഭയ്ക്കു ലഭിച്ച സമ്മാനം ആട്ടിന്‍കുട്ടി. വാഴയൂര്‍ പഞ്ചായത്ത് ഇന്നലെ നടത്തിയ സ്‌കൂള്‍ കായികമേളയിലാണ് വേറിട്ട സമ്മാനം നല്‍കിയത്.
കൂടുതല്‍ പോയിന്റ് ലഭിക്കുന്ന വിദ്യാര്‍ഥിക്ക് ആട്ടിന്‍കുട്ടിയെ സമ്മാനമായി നല്‍കുമെന്നു നേരത്തെതന്നെ അറിയിച്ചിരുന്നെങ്കിലും തുല്യ പോയിന്റോടെ രണ്ട് വിദ്യാര്‍ഥികള്‍ പ്രതിഭാപട്ടത്തിന് അര്‍ഹരായി. അതോടെ ഇരുവര്‍ക്കും ആട്ടിന്‍കുട്ടിയെ സമ്മാനമായി നല്‍കുകയായിരുന്നു.
പ്രതിഭകളായ കാരാട് പത്മ എ.യു.പി സ്‌കൂളിലെ അതീഖ് സാജിദ്, അഭിരാമി എന്നീ വിദ്യാര്‍ഥികള്‍ക്ക് വാഴയൂര്‍ പഞ്ചായത്ത് പ്രസിഡന്റ് വിമല പാറക്കണ്ടത്തില്‍ സമ്മാനം നല്‍കി. പ്രകാശന്‍ മാസ്റ്റര്‍ അധ്യക്ഷനായി. പഞ്ചായത്തംഗം ശേഖരന്‍, തുളസി, അധ്യാപകരായ സന്തോഷ്, മന്‍സൂര്‍ സംസാരിച്ചു.