ശ്രീകൃഷ്ണപുരം: കൈക്കൂലി കേസില്‍ ഒറ്റപ്പാലം താലൂക്ക് സര്‍വയറെ വിജിലന്‍സ് അറസ്റ്റ് ചെയ്തു. പാലക്കാട് റോബിന്‍സണ്‍ റോഡിലെ മിഷന്‍  കോളനി നിവാസി പി.എസ് രാമദാസിനെയാണ് വിജിലന്‍സ് പിടികൂടിയത്. കരിമ്പുഴ കുന്നക്കാട് എടപ്പലത്ത് വീട്ടില്‍ രാജന്റെ കൈവശമുള്ള  ഭൂമി സര്‍വ്വെ പ്രകാരം അളന്ന് തിട്ടപ്പെടുത്തി സബ് ഡിവിഷന്‍ തിരിച്ചു നല്‍കുന്നതിന് വേണ്ടിയാണ് 5000 രൂപ കൈകൂലി വാങ്ങിയത്. ഇതിനു മുന്‍പും രാജന്റെ കൈയ്യില്‍ നിന്നും ആയിരം രൂപ കൈകൂലി വാങ്ങിയിരുന്നു. ഇതേ തുടര്‍ന്ന് രാജന്‍ പാലക്കാട് വിജിലന്‍സ് ഉദ്യോഗസ്ഥര്‍ക്ക് നല്‍കിയ പരാതിയുടെ അടിസ്ഥാനത്തില്‍ കഴിഞ്ഞ ഒരാഴ്ച്ചയായി വിജിലന്‍സ് ഉദ്യോഗസ്ഥര്‍ ഇദ്ദേഹത്തെ നിരീക്ഷിച്ച്  വരികയായിരുന്നു.
വ്യാഴാഴ്ച്ച രാവിലെ കരിമ്പുഴ ഒന്ന് വില്ലേജ് ഓഫിസിന് പരിസരത്ത് വച്ച് പണം നല്‍കണമെന്ന് രാജനെ രാമദാസ് അറിയിച്ചത് പ്രകാരം വിജിലന്‍സ് നല്‍കിയ ഫിനോഫ്ത്തലിന്‍ പൊടി പുരട്ടിയ പണമാണ് രാജന്‍ നല്‍കിയത്. അടുത്ത നിമിഷം തന്നെ വേഷം മാറിയെത്തിയ വിജിലന്‍സ്  ഉദ്യോഗസ്ഥര്‍ രാമദാസിനെ പിടികൂടുകയായിരുന്നു. ആയിരംരൂപയുടെ രണ്ട് നോട്ടുകളും 500 രൂപയുടെ ആറ് നോട്ടുകളുമാണ് നല്‍കിയത്.
വിജിലന്‍സ് ഡി.വൈ.എസ്.പി എം സുകുമാരന്റെ നേതൃത്വത്തിലാണ് സംഘമാണ് രാമദാസിന്റെ പിടികൂടിയത്. ഇയാള്‍ക്കെതിരേ ഇതിനു മുന്‍പ് നിരവധി പരാതികള്‍  ലഭിച്ചതായി ഡിവൈ.എസ്.പി പറഞ്ഞു. തൃശൂര്‍ വിജിലന്‍സ് കോടതിയില്‍ ഹാജറാക്കി റിമാന്റ് ചെയ്തു. ഡി.വൈ.എസ്.പി സുകുമാരനെ കൂടാതെ എം ശശിധരന്‍, പി വേണുഗോപാല്‍, ഡി ലാലു, ബി സുരേന്ദ്രന്‍, എന്‍ രാജീവ് കുമാര്‍, പി.വി നാരായണന്‍, ഷംസീര്‍ അലി, എ.ബി സന്തോഷ്, അനില്‍കുമാര്‍, രാജേഷ്, ശങ്കര്‍ സംഘത്തിലുണ്ടായിരുന്നു