മൂവാറ്റുപുഴ: അനധികൃത അറവുശാലകള്‍ക്ക് നല്‍കുന്ന പിഴയായ ആയിരം രൂപ വര്‍ധിപ്പിക്കണമെന്ന നിര്‍ദേശത്തോടെ വിജിലന്‍സ് ആന്‍ഡ് ആന്റികറപ്ഷന്‍ ബ്യൂറോ ഡിവൈ.എസ്.പി ത്വരിതാന്വേഷണ റിപ്പോര്‍ട്ട് മൂവാറ്റുപുഴ വിജിലന്‍സ് കോടതിയില്‍ സമര്‍പ്പിച്ചു. സംസ്ഥാനത്തെ തദ്ദേശ സ്വയംഭരണ സ്ഥാപനങ്ങള്‍ക്ക് നിയമപരമായി ലഭിക്കേണ്ട 5000 കോടി രൂപ അഞ്ച് വര്‍ഷത്തിനുള്ളില്‍ നഷ്ടപ്പെട്ടതിനെക്കുറിച്ച് അന്വേഷണം ആവശ്യപ്പെട്ട് മൂവാറ്റുപുഴ വിജിലന്‍സ് കോടതിയില്‍ മൃഗസംഘടനയായ ദയ നല്‍കിയ ഹരജിയില്‍ സംസ്ഥാനത്തെ മുഴുവന്‍ തദ്ദേശ സ്വയംഭരണ സ്ഥാപനങ്ങളെയും മുന്‍ മുഖ്യമന്ത്രി, മുന്‍ മന്ത്രിമാര്‍ എന്നിവരെയും എതിര്‍കക്ഷികളാക്കി ഹരജി ഫയല്‍ ചെയ്തിരുന്നു. മൂവാറ്റുപുഴ മുനിസിപ്പാലിറ്റി, പായിപ്ര പഞ്ചായത്ത് എന്നീ തദ്ദേശ സ്ഥാപനങ്ങളെക്കുറിച്ചാണ് ജഡ്ജി പി.മാധവന്‍ ത്വരിതാന്വേഷണത്തിന് ഉത്തരവിട്ടത്. ഇതിനെ തുടര്‍ന്നുള്ള അന്വേഷണറിപ്പോര്‍ട്ടാണ് വിജിലന്‍സ് കോടതിയില്‍ സമര്‍പ്പിച്ചിരിക്കുന്നത്.