പാലക്കാട്: മൂന്നുദിവസത്തെ സി.ഐ.ടി.യു സംസ്ഥാന സമ്മേളനത്തിന് പാലക്കാട്ട് തുടക്കമായി. പൊതുസമ്മേളനനഗരിയായ കോട്ടമൈതാനിയില്‍ സ്വാഗതസംഘം കണ്‍വീനര്‍ പി.കെ ശശി എം.എല്‍.എ പതാക ഉയര്‍ത്തി. കണ്ണമ്പ്രയില്‍ നിന്നുമെത്തിച്ച കൊടിമരത്തിലാണ് ഞാങ്ങാട്ടിരിയില്‍ നിന്നുമെത്തിച്ച പതാക ഉയര്‍ത്തിയത്.
സി.ഐ.ടി.യു അഖിലേന്ത്യാ സെക്രട്ടറി കെ.കെ ദിവാകരന്‍ പതാക ഏറ്റുവാങ്ങി. സംസ്ഥാന സെക്രട്ടറി വി.സി കാര്‍ത്ത്യായനി കൊടിമരവും സംസ്ഥാനകമ്മിറ്റി അംഗങ്ങളായ എ. പ്രഭാകരനും എം.എസ് സ്‌കറിയയും ദീപശിഖയും ഏറ്റുവാങ്ങി. സി.ഐ.ടി.യു ജില്ലാസെക്രട്ടറി എം. ഹംസ സ്വാഗതം പറഞ്ഞു. സംസ്ഥാന പ്രസിഡന്റ് ആനത്തലവട്ടം ആനന്ദന്‍, ജനറല്‍ സെക്രട്ടറി എളമരം കരീം, മന്ത്രി എ.കെ ബാലന്‍, മുതിര്‍ന്ന നേതാക്കളായ എം.എം ലോറന്‍സ്, കെ.എം സുധാകരന്‍, അഖിലേന്ത്യാ സെക്രട്ടറി പി. നന്ദകുമാര്‍, സി.പി.എം ജില്ലാ സെക്രട്ടറി സി.കെ രാജേന്ദ്രന്‍ എന്നിവര്‍ പങ്കെടുത്തു.
പ്രതിനിധി സമ്മേളനം രാവിലെ മുനിസിപ്പല്‍ ടൗണ്‍ഹാളിലെ സി. കണ്ണന്‍ നഗറില്‍ തുടങ്ങും. സി.ഐ.ടി.യു സംസ്ഥാന പ്രസിഡന്റ് ആനത്തലവട്ടം ആനന്ദന്‍ പതാക ഉയര്‍ത്തും. അഖിലേന്ത്യാ ജനറല്‍ സെക്രട്ടറി തപന്‍സെന്‍ ഉദ്ഘാടനം ചെയ്യും.