വൈത്തിരി: സംസ്ഥാന ലൈബ്രറി കൗണ്‍സില്‍ ഗ്രാമീണ ഗ്രന്ഥശാലകളിലെ ലൈബ്രേറിയന്‍മാര്‍ക്കായി സംഘടിപ്പിക്കുന്ന ലൈബ്രേറിയന്‍മാര്‍ക്കുള്ള ഹ്രസ്വകാല പരിശീലനം വൈത്തിരി താലൂക്കില്‍ സമാപിച്ചു. 2016 ഒക്ടോബര്‍ മൂന്നിന് കല്‍പ്പറ്റ ജില്ലാ ലൈബ്രറി ഹാളില്‍ ആരംഭിച്ച പരിശീലനം 20 ദിവസത്തെ സെഷനുകളോടെയാണ് പൂര്‍ത്തിയായത്. പരിശീലനത്തിനായി താലൂക്കിലെ 58 അഫിലിയേറ്റഡ് ലൈബ്രറികളിലെ ലൈബ്രേറിയന്‍മാരെയാണ് തിരഞ്ഞെടുത്തത്.
ക്ലാസിഫിക്കേഷന്‍, ബുക്ക് കാറ്റലോഗിങ്, ഓഫിസ് റിക്കോര്‍ഡ്‌സ് മെയിന്റനന്‍സ്, കമ്യൂണിക്കേഷന്‍ ടെക്ക്‌നോളജി, കോഹ ഓണ്‍ലൈന്‍ ബുക്ക് സോഫ്റ്റ്‌വെയര്‍ പരിശീലനം, ഗ്രന്ഥശാലാ ചരിത്രം തുടങ്ങിയ വിവിധ സെഷനുകളില്‍ സെന്റ്‌മെരീസ് കോളജ് ലൈബ്രേറിയന്‍ ഷീന ജോര്‍ജ്ജ്, മുട്ടില്‍ ഡബ്ല്യൂ.എം.ഒ കോളജ് ലൈബ്രേറിയന്‍ കെ.എം ആസിഫ്, ജിതേന്ദ്രന്‍, കണ്ണൂര്‍ ചിന്‍മയ ഇന്‍സ്റ്റിറ്റ്യൂട്ട് ലൈബ്രേറിയന്‍ എം.പി പ്രശാന്ത്, താനൂര്‍ കെ.എല്‍.എ.ഇ.ടി റഫറന്‍സ് അസിസ്റ്റന്റ് കെ. ഹാരിസ്, ജില്ലാ ലൈബ്രറി ലൈബ്രേറിയന്‍ സുമേഷ് ഫിലിപ്പ്, പഴശ്ശിരാജ ഗ്രന്ഥാലയം ലൈബ്രേറിയന്‍ സി.ടി മിഥുന്‍ തുടങ്ങിയവര്‍ ക്ലാസെടുത്തു. പരിശീലനം പൂര്‍ത്തിയാക്കിയവര്‍ക്ക് പരീക്ഷയും പ്രാക്ടിക്കല്‍ സെഷനും നല്‍കി. പരിശീലനം പൂര്‍ത്തീകരിച്ച ലൈബ്രേറിയന്‍മാര്‍ക്ക് കേരള സ്റ്റേറ്റ് ലൈബ്രറി കൗണ്‍സില്‍ സര്‍ട്ടിഫിക്കറ്റ് നല്‍കും.