കോഴിക്കോട്: വേരുകളെ ഉള്ളിലേക്കാവാഹിച്ച് സര്‍ഗാത്മകമാകുന്ന മതിലുകളെയും പൊടിവലിച്ചു തുമ്മുന്ന മതിലിലെ ചെടികളെയും വേരില്‍ നിന്ന് മുളപൊട്ടുന്ന പ്രതീക്ഷയുടെ പുതുനാമ്പുകളെയും സ്‌കൂളിന്റെ മതിലിനുള്ളിലൂടെ വളരുന്ന വേരിനെയും മതിലിനിടയിലെ ചെറിയ വിടവിനുള്ളിലൂടെ ആരും കാണാതെ ഒളിഞ്ഞുനോക്കുന്ന ഇളം തൈകളെയുമെല്ലാം മൊബൈല്‍ കാമറയിലൊതുക്കി പ്രതാപ് ജോസഫിന്റെ ഫോട്ടോ പ്രദര്‍ശനം. പലപ്പോഴായി മൊബൈല്‍ കാമറയില്‍ പകര്‍ത്തിയ 150 മതില്‍ ചിത്രങ്ങളാണ് ആര്‍ട്ട് ഗാലറിയില്‍ നടക്കുന്ന 'മതിലുകള്‍' എന്നു പേരിട്ടിരിക്കുന്ന പ്രദര്‍ശനത്തിലുള്ളത്.
കുട്ടികള്‍ കോറിയിട്ട മതില്‍ ചിത്രങ്ങളും പാതി കീറിയ സിനിമാ പോസ്റ്ററുകളുള്ള പാതയോരത്തെ മതിലുമെല്ലാം പ്രദര്‍ശനത്തിലുള്‍പ്പെടുത്തിയിട്ടുണ്ട്. യൂനിവേഴ്‌സിറ്റി സ്വദേശിയായ പ്രതാപ് ജോസഫ് ചലച്ചിത്രപ്രവര്‍ത്തകനാണ്. ക്രൈം നമ്പര്‍ 89 എന്ന ചിത്രത്തിനു വേണ്ടി കാമറ ചലിപ്പിച്ച പ്രതാപ് കുറ്റിപ്പുറം പാലം, അവള്‍ക്കൊപ്പം തുടങ്ങിയ സിനിമകള്‍ സംവിധാനം ചെയ്യുകയും ചെയ്തു. 2013ലെ ലളിതകലാ അക്കാദമിയുടെ ഫെലോഷിപ്പ് ലഭിച്ചിട്ടുണ്ട്.