നാദാപുരം: വെള്ളൂരില്‍ കൊലചെയ്യപ്പെട്ട യൂത്ത് ലീഗ് പ്രവര്‍ത്തകന്‍ അസ്‌ലമിന്റെ കുടുംബത്തിന്റെ സര്‍ക്കാര്‍ തടഞ്ഞുവച്ച ധനസഹായം ഉടന്‍ വിതരണം ചെയ്യും.
ഡല്‍ഹിയിലുള്ള ജില്ലാ കലക്ടര്‍ എന്‍. പ്രശാന്ത് തിരിച്ചെത്തിയാല്‍ സഹായവിതരണത്തിനുള്ള നടപടിക്രമങ്ങള്‍ ആരംഭിക്കും. നേരത്തെ വടകരയിലും തൂണേരിയിലും നടന്ന സര്‍വകക്ഷി യോഗത്തില്‍ ഇവരുടെ തടഞ്ഞുവച്ച ധനസഹായം നല്‍കാന്‍ ആവശ്യമുയര്‍ന്നിരുന്നു.
വെള്ളൂരില്‍ ഡി.വൈ.എഫ്.ഐ പ്രവര്‍ത്തകന്‍ ഷിബിന്‍ കൊല്ലപ്പെട്ടതിനെത്തുടര്‍ന്നുണ്ടായ വ്യാപക അക്രമത്തില്‍ നൂറിലധികം വീടുകള്‍ തകര്‍ക്കപ്പെട്ടിരുന്നു. അസ്‌ലമിന്റെ കുടുംബ വീടും അന്നത്തെ ആക്രമണത്തില്‍ തകര്‍ക്കപ്പെട്ടു. എന്നാല്‍ ഷിബിന്‍ വധക്കേസില്‍ പ്രതിയായതോടെ അസ്‌ലമിന്റെ കുടുംബത്തിനുള്ള നഷ്ടപരിഹാരത്തുക തടഞ്ഞുവയ്ക്കുകയായിരുന്നു.
സംഭവത്തെ തുടര്‍ന്ന് സ്ഥലം സന്ദര്‍ശിച്ച മുഖ്യമന്ത്രി ഉമ്മന്‍ ചാണ്ടിയാണ് അക്രമണത്തിനിരയായവര്‍ക്ക് നഷ്ടപരിഹാരം പ്രഖ്യാപിച്ചത്.
കൊലചെയ്യപ്പെട്ട ഷിബിന്റെ കുടുംബത്തിന് 25 ലക്ഷംരൂപയും വീടുകള്‍ക്ക് നഷ്ടം സംഭവിച്ചവര്‍ക്ക് 1000 രൂപ മുതല്‍ 22 ലക്ഷംരൂപ വരെയാണ് സര്‍ക്കാര്‍ ധനസഹായം നല്‍കിയത്. വധക്കേസിലെ പ്രതികളെ കോടതി വെറുതെ വിട്ടതോടെയാണ് ഇവര്‍ക്ക് നഷ്ടപരിഹാരത്തുക നല്‍കണമെന്ന ആവശ്യം വീണ്ടും ഉയര്‍ന്നത്. ഇതിനിടെ ഓഗസ്റ്റ് 12ന് സി.പി.എം ആക്രമണത്തില്‍ അസ്‌ലം വധിക്കപ്പെടുകയും ചെയ്തു