മുംബൈ: കേരള അണ്ടര്‍ 19 താരം ഡാരില്‍ എസ് ഫെരാരിയോയെ ഇന്ത്യ അണ്ടര്‍ 19 ടീമിലേക്ക് തിരഞ്ഞെടുത്തു. ശ്രീലങ്കയില്‍ നടക്കുന്ന അണ്ടര്‍ 19 യൂത്ത് ഏഷ്യ കപ്പ് ടൂര്‍ണമെന്റിലേക്കുള്ള ഇന്ത്യന്‍ ടീമിലാണ് ഡരില്‍ ഇടംപിടിച്ചത്.
ഡിസംബര്‍ 13 മുതല്‍ 24 വരെയാണ് ടൂര്‍ണമെന്റ്. അഭിഷേക് ശര്‍മയാണ് 15 അംഗ ടീമിന്റെ നായകന്‍. അണ്ടര്‍ 16 വിജയ് മര്‍ച്ചന്റ് ട്രോഫിയില്‍ തമിഴ്‌നാടിനായി കളിച്ച ഡാരില്‍ കഴിഞ്ഞ വര്‍ഷമാണ് കേരള ടീമിലെത്തുന്നത്. നേരത്തെ ചലഞ്ചര്‍ ട്രോഫിക്കുള്ള ടീമിലേക്കും ഡാരിലിനെ തിരഞ്ഞെടുത്തിരുന്നു.
റൈഫി വിന്‍സെന്റ് ഗോമസ്, ശ്രീകുമാര്‍ നായര്‍, എം സുരേഷ് കുമാര്‍, സഞ്ജു സാംസണ്‍, രോഹന്‍ പ്രേം തുടങ്ങിയര്‍ നേരത്തെ അണ്ടര്‍ 19 ഇന്ത്യന്‍ ടീമില്‍ കളിച്ച കേരള താരങ്ങളാണ്.