പെരുമ്പാവൂര്‍: റോഡിനരികല്‍ വന്‍തോതില്‍ മാലിന്യം നിക്ഷേപിച്ചത് നാട്ടുകാര്‍ക്ക് ബുദ്ധിമുട്ടുണ്ടാക്കുന്നതായി പരാതി.
പുല്ലുവഴി സാഞ്ചോ കോളജിന് സമീപം ദിനവും അനേകം പേര്‍ വഴിനടക്കുന്ന റോഡിന് വശത്തായാണ് പ്ലാസ്റ്റിക്ക്, പേപ്പര്‍ മാലിന്യങ്ങള്‍ തള്ളിയിരിക്കുന്നത്. സമീപത്തെ പള്ളി ഓഡിറ്റോറിയത്തില്‍ നടക്കുന്ന വിരുന്നു സല്‍ക്കാരങ്ങളുടെ മാലിന്യങ്ങളാണ് ഇവയെന്ന് നാട്ടുകാര്‍ പറയന്നു.
ഓഡിറ്റോറിയത്തിനു സമീപം കുഴിച്ചുമൂടിയിരുന്ന ഇവ കഴിഞ്ഞ ശനിയാഴ്ച്ചയാണ് പുറത്തെടുത്ത് റോഡരികിലെ സ്വകാര്യ വ്യക്തിയുടെ പറമ്പില്‍ കൂട്ടിയിട്ടത്. ഇത്തരത്തില്‍ 10 ലോഡോളം മാലിന്യം ഇവിടെ നിക്ഷേപിച്ചിട്ടുണ്ടെന്നും നാട്ടുകാര്‍ ആരോപിച്ചു.
ഇത് ചോദ്യം ചെയ്ത നാട്ടുകാര്‍ക്ക് സ്ഥലം ഉടമയുടെ അനുവാതം ലഭിച്ച ശേഷമാണ് മാലിന്യം നിക്ഷേപിച്ചതെന്ന മറുപടിയാണ് ലഭിച്ചത്.
മഴ പെയ്തതോടെ മാലിന്യ കൂമ്പാരത്തില്‍നിന്നും വരുന്ന ദുര്‍ഗന്ധം സഹിക്കാന്‍ കഴിയാത്ത അവസ്ഥയിലാണ് പ്രദേശവാസികള്‍. കൂടതെ തെരുവ് നായ്ക്കളും കാക്കയും ഇവ കൊത്തി വലിച്ച് റോഡിലൂടെ നിരത്തുന്നതും പതിവാണ്. നാട്ടുകാരെ പൊറുതിമുട്ടിക്കുന്ന മാലിന്യ കൂമ്പാരം എത്രയും പെട്ടന്ന് ഇവിടെനിന്നും മാറ്റണമെന്നാണ് പ്രദേശവാസികളുടെ ആവശ്യം.