ചങ്ങരംകുളം: ചങ്ങരംകുളം മേഖലയില്‍ തിങ്കളാഴ്ച പുലര്‍ച്ചെയും ചൊവ്വാഴ്ചയുമായുണ്ടായ കാറ്റിലും മഴയിലും കനത്ത നാശനഷ്ടം. പലയിടത്തും മരങ്ങള്‍ കടപുഴകി വീണു. മണിക്കൂറോളം വൈദ്യുതി ബന്ധം പലയിടത്തും തടസ്സപ്പെട്ടു. സംസ്ഥാനപാതയില്‍ ചങ്ങരംകുളം പൊലിസ് സ്റ്റേഷന് സമീപത്ത് തേക്കുമരം ഒടിഞ്ഞ് വീണ് വൈദ്യുതി തൂണ്‍ പൊട്ടി. നാട്ടുകാര്‍ വിവരമറിയിച്ചതിനെത്തുടര്‍ന്ന് കെ.എസ്.ഇ.ബി അധികൃതരെത്തി ലൈന്‍ ഓഫ് ചെയ്ത് വൈദ്യുതി ബന്ധം പുന:സ്ഥാപിച്ചു. പലയിടത്തും ഓലകളും ചില്ലകളും റോഡിലേക്ക് വീണതും ഗതാഗതത്തെ ബാധിച്ചു. ചിലയിടങ്ങളില്‍ വീടിന് മുകളില്‍ സ്ഥാപിച്ച ഷീറ്റുകള്‍ ശക്തമായ കാറ്റില്‍ പറന്ന് പോയി. കഴിഞ്ഞ ദിവസത്തെ മഴയെ തുടര്‍ന്ന് കെ.എസ്.ഇ.ബി ഉദ്യോഗസ്ഥര്‍ മരക്കൊമ്പുകള്‍ നീക്കം ചെയ്യാന്‍ തുടങ്ങിയത് ജനങ്ങള്‍ക്ക് ആശ്വാസമായി.