പൂനെ: കളിക്കൊപ്പം കൈയാങ്കളി അരങ്ങേറിയ, റഫറി ഒന്‍പതു മഞ്ഞ കാര്‍ഡുകള്‍ പുറത്തെടുത്ത നാടകീയ പോരാട്ടത്തില്‍ കരുത്തരായ അത്‌ലറ്റിക്കോ ഡി കൊല്‍ക്കത്തയെ 2-1നു വീഴ്ത്തി പൂനെ സിറ്റി എഫ്.സി വിജയം സ്വന്തമാക്കി. പൂനെയുടെ തട്ടകത്തില്‍ നടന്ന മത്സരത്തില്‍ ഇരു പകുതികളിലായി നേടിയ ഗോളുകളാണ് പൂനെയ്ക്ക് വിജയമൊരുക്കിയത്.
പൂനെയ്ക്കായി എഡ്വാര്‍ഡൊ ഫെരെരയും അനിബാല്‍ സുര്‍ദോയും ഗോള്‍ നേടിയപ്പോള്‍ ഇയാന്‍ ഹ്യൂമാണ് കൊല്‍ക്കത്തയുടെ ആശ്വാസ ഗോള്‍ സ്വന്തമാക്കിയത്.
ആദ്യ പകുതിയുടെ 41ാം മിനുട്ടിലാണ് എഡ്വാര്‍ഡോ പൂനെയെ മുന്നില്‍ കടത്തിയത്. രണ്ടാം പകുതി തുടങ്ങി 56ാം മിനുട്ടില്‍ അനിബാല്‍ പൂനെയുടെ ലീഡ് രണ്ടാക്കി ഉയര്‍ത്തി. പെനാല്‍റ്റിയില്‍ നിന്നാണ് ഈ ഗോളിന്റെ പിറവി. 69ാം മിനുട്ടില്‍ ലഭിച്ച പെനാല്‍റ്റി വലയിലെത്തിച്ച് ഇയാന്‍ ഹ്യൂം പരാജയ ഭാരം കുറച്ചു. ഹ്യൂമെടുത്ത എടുത്ത കിക്ക് ഗോളി തടുത്തെങ്കിലും റീ ബൗണ്ടിലാണ് ഹ്യൂം വല ചലിപ്പിച്ചത്.
എട്ടു കളികളില്‍ നിന്നു രണ്ടാം വിജയം സ്വന്തമാക്കിയ പൂനെ ബ്ലാസ്റ്റേഴ്‌സിനെ പിന്തള്ളി ആറാം സ്ഥാനത്തേക്ക് കയറി.