അടിമാലി: പൊന്മുടി ജലാശയത്തിലെ മരക്കുറ്റികള്‍ വെട്ടി നീക്കി ബോട്ടിംഗ് പുനരാരംഭിക്കുന്നതിനുള്ള നടപടികള്‍ ഇഴയുന്നു. മരക്കുറ്റികള്‍ വെട്ടി നീക്കുന്നതിന് സര്‍ക്കാര്‍ ഉത്തരവുണ്ടായിട്ടും വനം വകുപ്പും ഹൈഡല്‍ ടൂറിസം ഉദ്യോഗസ്ഥരും വനം -മണല്‍ മാഫിയായും ചേര്‍ന്നുള്ള ഒത്തുകളിയാണ് നിലവില്‍ പദ്ധതി അനിശ്ചിതത്വത്തില്‍ തുടരുവാന്‍ കാരണമെന്ന് പ്രദേശവാസികള്‍ ആരോപിക്കുന്നു. 

രാജാക്കാട്, കൊന്നത്തടി പഞ്ചായത്തുകളുടെ സമഗ്രമായ വികസനത്തിന് ഉതകുന്ന ജില്ലയിലെ തന്നെ മികച്ച പദ്ധതികളിലൊന്നായി മാറേണ്ട പദ്ധതിയായിരുന്നു പൊന്മുടി ജലാശയത്തിലെ ഹൈഡല്‍ ടൂറിസം പദ്ധതി.
എന്നാല്‍ ആരംഭത്തില്‍ തന്നെ അവസാനിച്ച പദ്ധതി പുനരാരംഭിക്കുന്നതിന് ബന്ധപ്പെട്ട അധികൃതര്‍ യാതൊരു നടപടികളും സ്വീകരിക്കുന്നില്ല. അണക്കെട്ട് നിര്‍മ്മിക്കുന്ന കാലത്ത് ഇതിനുള്ളിലുണ്ടായിരുന്ന നിരവധി വന്‍മരങ്ങള്‍ ബോട്ടിംഗിന് ഭീഷിണിയാണെന്ന ആദ്യഘട്ടത്തില്‍ തന്നെ ആരോപണമുയര്‍ന്നിരുന്നു. ഇത് കണക്കിലെടുക്കാതെ അധികൃതര്‍ ബോട്ടിംഗ് ആരംഭിക്കുകയും ചെയ്തു.
ചുരുങ്ങിയ ദിവസങ്ങള്‍ കൊണ്ട് പൊന്മുടി സഞ്ചാരികളുടെ ഇഷ്ടകേന്ദ്രമായി മാറി. എന്നാല്‍ പൊന്മുടിയില്‍ നിന്നും ലക്ഷങ്ങള്‍ വരുമാനമുണ്ടാക്കിയിരുന്ന വനം, മണല്‍ മാഫിയാ സംഘങ്ങള്‍ ഇടപെട്ട് ബോട്ടിംഗ് അട്ടിമറിക്കുന്നതിന് വേണ്ടി ഉന്നത ഉദ്യോഗസ്ഥര്‍ക്ക് മരക്കുറ്റികള്‍ വെട്ടിമാറ്റാതെ ബോട്ടിംഗ് നടത്തുന്നതിന് ഭീഷിണിയാണെന്ന് കാണിച്ച് പരാതി നല്‍കുകയും ഇതിന്റെ അടിസ്ഥാനത്തില്‍ ബോട്ടിംഗ് താല്‍ക്കാലികമായി നിര്‍ത്തിവയ്ക്കാന്‍ ഉത്തരവിടുകയുമായിരുന്നു.
ഇതിന് ശേഷം മാഫിയാ സംഘങ്ങള്‍ പദ്ധതി അട്ടിമറിക്കുവാന്‍ ശ്രമിക്കുകയാണെന്നും മരക്കുറ്റികള്‍ വെട്ടി നീക്കി ബോട്ടിംഗ് പുനരാരംഭിക്കുന്നതിന് നടപടി സ്വീകരിക്കണമെന്ന ആവശ്യവുമായി നാട്ടുകാര്‍ രംഗത്തെത്തി. തുടര്‍ന്ന് ഇവ വെട്ടിമാറ്റി ബോട്ടിംഗ് പുനരാരംഭിക്കുന്നതിന് വകുപ്പ് തല ഉത്തരവിറങ്ങുകയും ചെയ്തു.
എന്നാല്‍ ഉത്തരവിറങ്ങി ഒരുമാസം പിന്നിട്ടിട്ടും അണക്കെട്ടിനുള്ളില്‍ ഉയര്‍ന്ന് നിന്നിരുന്ന പഴയ കെട്ടിടം പൊളിച്ച് നീക്കിയതല്ലാതെ മറ്റൊരു നടപടിയും സ്വീകരിച്ചിട്ടില്ല.
കുറ്റികള്‍ വെട്ടിമാറ്റുന്നതിന് വനം വകുപ്പ് ഉദ്യോഗസ്ഥര്‍ സ്ഥലത്തെത്തുകയും സര്‍വ്വേ നത്തുകയും ചെയ്തിരുന്നു. അടിയന്തിരമായി പ്രശ്‌നത്തിന് പരിഹാരം കണ്ടില്ലെങ്കില്‍ ശക്തമായ സമരത്തിന് നേതൃത്വം നല്‍കുമെന്നും പ്രദേശവാസികള്‍ പറഞ്ഞു.
വേനല്‍ മഴ ശക്തമായതിനാല്‍ ദിവസങ്ങള്‍ക്കകം അണക്കെട്ടില്‍ ജലനിരപ്പുയരും. കാലവര്‍ഷം ആരംഭിച്ചാല്‍ മരക്കുറ്റികള്‍ വെട്ടിമാറ്റുന്ന നടപടി അനന്തമായി നീളുകയും ഈ അവസരം മുതലെടുത്ത് മാഫിയാ സംഘങ്ങള്‍ക്ക് മുതലെടുപ്പ് നടത്തുവാനും കഴിയും. അങ്ങനെയുണ്ടായാല്‍ പൊന്മുടി ഹൈഡല്‍ ടൂറിസം പദ്ധതി സാശ്വതമായി ഇല്ലാതാകും.