റിയാദ്: ഗള്‍ഫ് രാജ്യങ്ങളില്‍ സ്വദേശി വത്കരണം ശക്തിപ്പെടുത്തുന്നതിന് ഗള്‍ഫ് രാഷ്ട്രങ്ങളുടെ സംയുക്ത ശ്രമം. ഇതിനായി ജി.സി.സി രാജ്യങ്ങളിലെ തൊഴില്‍ മന്ത്രിമാര്‍ അടുത്തയാഴ്ച റിയാദില്‍ യോഗം ചേരും. ജി.സി.സി അംഗ രാജ്യങ്ങളിലെ തൊഴില്‍ മന്ത്രിമാരുടെ 16 മത് ഉച്ചകോടി റിയാദില്‍ ചേരുന്നതിനോടനുബന്ധിച്ചാണ് ഇതേക്കുറിച്ച് ചര്‍ച്ച സംഘടിപ്പിക്കുന്നത്.

ജി.സി.സി അംഗ രാജ്യങ്ങളിലെ രൂക്ഷമായ തൊഴിലില്ലായ്മയും തൊഴില്‍ പ്രതിസന്ധിയും പരിഹരിക്കുക, ജിസിസി രാജ്യങ്ങളില്‍ ഏകീകൃത തൊഴില്‍ നിയമം നടപ്പില്‍ വരുത്തുക, തൊഴില്‍ മേഖലയിലെ വിദേശികളുടെ ശക്തമായ സ്വാധീനം എന്നീ സുപ്രധാന കാര്യങ്ങളില്‍ തൊഴില്‍ മന്ത്രിമാരുടെ ഉച്ചകോടിയില്‍ തീരുമാനമുണ്ടായേക്കും.

13 ന് ഞായറാഴ്ച സഊദി തൊഴില്‍ സാമൂഹിക ക്ഷേമകാര്യ വകുപ്പ് മന്ത്രി ഡോ: മുഫ് റജ് അല്‍ ഹഖ്ബാനിയുടെ അധ്യക്ഷതയിലാണ് യോഗം ചേരുന്നത്. ഗള്‍ഫ് രാജ്യങ്ങളിലെ തൊഴില്‍ രംഗത്ത് ചരിത്രപരമായ ചില പ്രഖ്യാപനങ്ങള്‍ ഉണ്ടാവുമെന്നാണ് റിപ്പോര്‍ട്ടുകള്‍. ജിസിസി പൗരന്മാര്‍ക്ക് കൂടുതല്‍ തൊഴില്‍ സാധ്യത തേടിയുള്ള പ്രഖ്യാപനം വരുന്നതോടെ വിദേശികള്‍ക്ക് കനത്ത തിരിച്ചടിയായിരിക്കും നേരിടേണ്ടി വരിക.