കൊച്ചി: പീഡനത്തെത്തുടര്‍ന്ന് ഗര്‍ഭിണിയായ സ്ത്രീയുടെ ഗര്‍ഭഛിദ്രത്തിന് ഹൈക്കോടതി അനുമതി നല്‍കി. വിദഗ്‌ധോപദേശം വേണ്ടി വന്നാല്‍ മെഡിക്കല്‍ ബോര്‍ഡിന് രൂപം നല്‍കി  ആരോഗ്യ സാഹചര്യങ്ങള്‍ വിലയിരുത്തി നിയമപ്രകാരമുള്ള നടപടിക്രമങ്ങള്‍ പൂര്‍ത്തിയാക്കി ഗര്‍ഭഛിദ്രം നടത്താനാണ് കോഴിക്കോട് മെഡിക്കല്‍ കോളജ് സൂപ്രണ്ടിനോടു നിര്‍ദേശിച്ചിട്ടുള്ളത്. പീഡനക്കേസ് രജിസ്റ്റര്‍ ചെയ്തിട്ടുള്ളതിനാല്‍ ഭ്രൂണത്തിന്റെ ഡി.എന്‍.എ പരിശോധനയ്ക്കുള്ള ഘടകങ്ങള്‍ ശേഖരിച്ച ശേഷമേ അബോര്‍ഷന്‍ നടത്താവൂ എന്നും ഉത്തരവില്‍ പറയുന്നു.
ഭ്രൂണത്തിന്റെ പ്രായം 20 ആഴ്ച പിന്നിട്ടാല്‍ ഗര്‍ഭഛിദ്രം നടത്തുന്നതിന് നിയന്ത്രണമുള്ളതിനാലാണ് യുവതി അനുമതി തേടി ഹൈക്കോടതിയെ സമീപിച്ചത്. പരിചയക്കാരനായ ഒരു കടയുടമ വിവാഹ വാഗ്ദാനം നല്‍കി പീഡിപ്പിച്ചതിനെത്തുടര്‍ന്നാണ് ഹരജിക്കാരി ഗര്‍ഭിണിയായതെന്നാണ് പരാതിയില്‍ പറഞ്ഞിരുന്നത്. തുടര്‍ന്നാണ് ഗര്‍ഭഛിദ്രം നടത്താന്‍ കാസര്‍കോട് സര്‍ക്കാര്‍ ആശുപത്രിയെയും കോഴിക്കോട് മെഡിക്കല്‍ കോളജിനെയും സമീപിച്ചത്. എന്നാല്‍ ഭ്രൂണ വളര്‍ച്ച 20 ആഴ്ച പിന്നിട്ടതിനാല്‍ ചെയ്യാനാവില്ലെന്നാണ് ആശുപത്രി അധികൃതര്‍ അറിയിച്ചത്. 12 ആഴ്ചയില്‍ താഴെ പ്രായമുള്ള ഭ്രൂണം ഇല്ലാതാക്കാന്‍ ഡോക്ടര്‍മാര്‍ക്ക് നിയമം അനുമതി നല്‍കുന്നുണ്ടെങ്കിലും 20 ആഴ്ചയിലെത്തിയ ഗര്‍ഭം നശിപ്പിക്കാന്‍ നിയന്ത്രണങ്ങളുണ്ട്. ഗര്‍ഭം അമ്മയുടെ ജീവന് ഭീഷണിയാകുമെന്നോ കുഞ്ഞിന്റെ ജനനം അമ്മയെ ശാരീരികമായോ മാനസികമായോ ബാധിക്കുമെന്നും രണ്ട് വിദഗ്ധ ഡോക്ടര്‍മാര്‍ വിലയിരുത്തിയാല്‍ മാത്രമേ ഇത്തരത്തില്‍ ഗര്‍ഭഛിദ്രം നടത്താനാവൂ. കൂടാതെ പീഡനത്തെത്തുടര്‍ന്ന് ഗര്‍ഭിണിയാവുന്ന സ്ത്രീയുടെ മാനസിക പ്രശ്‌നങ്ങള്‍ കണക്കിലെടുത്ത് ഇതു ചെയ്യാമെന്നും വിശദീകരിച്ചിട്ടുണ്ട്. ഇതു പരിഗണിച്ചാണ് ഹൈക്കോടതി  അനുമതി നല്‍കിയത്.