വടക്കാഞ്ചേരി: കേരള ആരോഗ്യ ശാസ്ത്ര സര്‍വകലാശാലയുടെ പ്രഥമ സെനറ്റ് രൂപീകരിച്ച് ചാന്‍സലര്‍ ഗവര്‍ണര്‍ പി.സദാശിവം ഉത്തരവ് പുറപ്പെടുവിച്ചു. ഒരു വര്‍ഷം മുമ്പ് സെനറ്റ് രൂപീകരിച്ചിരുന്നെങ്കിലും നിയമസഭാ തെരഞ്ഞെടുപ്പ് മൂലം രൂപീകരണ ഉത്തരവ് നീണ്ടു പോവുകയായിരുന്നു. പുതിയതായി നിലവില്‍ വന്ന നിയമസഭാംഗങ്ങളില്‍ നിന്ന് രണ്ടാമതും തെരഞ്ഞെടുപ്പ് നടത്തിയാണ് ഇപ്പോള്‍ ഉത്തരവിറക്കിയിട്ടുള്ളത്. കെ.വി അബ്ദുള്‍ ഖാദര്‍ (ഗുരുവായൂര്‍), പ്രൊഫസര്‍ കെ.യു അരുണന്‍ (ഇരിങ്ങാലക്കുട), സി.കെ ആശ, വൈക്കം, ആര്‍.രാജേഷ് മാവേലിക്കര എന്നിവരാണ് പുതിയ എം.എല്‍.എമാരുടെ പ്രതിനിധികള്‍, വ്യത്യസ്ത മണ്ഡലങ്ങളില്‍ നിന്നുള്ള 63 പേരും സെനറ്റിലുണ്ടാകും. ചാന്‍സലര്‍, പ്രോ ചാന്‍സലര്‍, വൈസ് ചാന്‍സലര്‍ പ്രോ വൈസ് ചാന്‍സലര്‍, ഗവണ്‍മെന്റ് സെക്രട്ടിമാര്‍, വിവിധ വകുപ്പ് ഡയറക്ടര്‍മാര്‍, ഉന്നത വിദ്യാഭ്യാസ കൗണ്‍സില്‍ മെമ്പര്‍, യൂണിവേഴ്‌സിറ്റി സ്റ്റുഡന്റ്‌സ് യൂണിയന്‍ ചെയര്‍മാന്‍, രജിസ്ട്രാര്‍, ഫാക്കല്‍റ്റി ഡീന്‍മാര്‍ എക്‌സ് ഒഫീഷ്യോ അംഗങ്ങളും, നോമിനേറ്റഡ് അംഗങ്ങളും ഉള്‍പ്പെടുന്നതാണ് പുതിയ സെനറ്റ്.