കൊച്ചി: മുതിര്‍ന്നവര്‍ക്കുണ്ടാവുന്ന ശ്വാസകോശ രോഗമായ ക്രോണിക് ഒബ്‌സ്ട്രക്ടീവ് പള്‍മനറി ഡിസീസ് (സി.ഒ.പി.ഡി) ദിനാചാരണത്തോടനുബന്ധിച്ച് കൊച്ചിന്‍ തൊറാസിക് സൊസൈറ്റിയുടെ ആഭിമുഖ്യത്തില്‍ ഇന്ന് ബോധവത്കരണ പരിപാടികളും രോഗനിര്‍ണയ ക്യാംപും നടത്തുന്നു. വായുമലിനീകരണം, പുകവലി എന്നീ വിഷയങ്ങളെ ആസ്പദമാക്കി സെന്‍ട്രല്‍ സ്‌ക്വയര്‍ മാളില്‍ ഫളാഷ് മോബ് സംഘടിപ്പിക്കും.
വാര്‍ത്താസമ്മേളനത്തില്‍ പ്രസിഡന്റ് ഡോ. ജേക്കബ് ബേബി, സെക്രട്ടറി ഡോ. രമേശ് നായര്‍ എന്നിവര്‍ പങ്കെടുത്തു.

ദേശം കവലയില്‍ സിഗ്‌നലായി

നെടുമ്പാശ്ശേരി: ദേശീയ പാതയില്‍ അപകടവും ഗതാഗതക്കുരുക്കും രൂക്ഷമായ ദേശം കവലയില്‍ സിഗ്‌നല്‍ സംവിധാനം പ്രവര്‍ത്തനം ആരംഭിച്ചു. സംസ്ഥാന മനുഷ്യാവകാശ കമ്മിഷന്റെ ഇടപെടലിനെ തുടര്‍ന്നാണ് ദേശീയ പാത അധികൃതര്‍ സിഗ്‌നല്‍ ലൈറ്റ് സ്ഥാപിക്കാന്‍ തയ്യാറായത്. നാല്‍ക്കവലയായ ദേശത്തെ തുടര്‍ച്ചയായ അപകടങ്ങളില്‍ നിരവധി പേര്‍ക്ക് ജീവഹാനി സംഭവിച്ചതിനെ തുടര്‍ന്ന് നാട്ടുകാരാണ് മനുഷ്യാവകാശ കമ്മിഷനും ജില്ല കലക്ടര്‍ക്കും ഓംബുഡ്‌സ്മാനും ഇത് സംബന്ധിച്ച് നിവേദനം നല്‍കിയിരുന്നത്.
അപകടങ്ങളുടെ നിരവധി ചിത്രങ്ങളും നിവേദനത്തോടൊപ്പം സമര്‍പ്പിച്ചിരുന്നു. ഇതേ തുടര്‍ന്ന് ദേശീയപാത പ്രൊജക്ട് ഓഫീസറോടും ജില്ല റുറല്‍ എസ്.പിയോടും സിഗ്‌നല്‍ സംവിധാനം അടിയന്തിരമായി ഏര്‍പ്പെടുത്താന്‍ മനുഷ്യാവകാശ കമ്മിഷന്‍ പ്രത്വേക ഉത്തരവിറക്കുകയായിരുന്നു.
സെമിനാരിപ്പടിയില്‍ സിഗ്‌നല്‍ സംവിധാനം കഴിഞ്ഞ ദിവസം ജില്ല റൂറല്‍ എസ്.പി പി.എന്‍ ഉണ്ണിരാജന്‍ ഉദ്ഘാടനം ചെയ്തിരുന്നു. ദേശം കുന്നുംപുറത്ത് ബ്‌ളിംഗര്‍ ലൈറ്റ് സ്ഥാപിക്കാനുള്ള നടപടി തിങ്കളാഴ്ച തുടക്കം കുറിക്കുകയും ചെയ്തിട്ടുണ്ട്. ദേശം കവലയിലെ അത്യാധുനിക രീതിയിലുള്ള സിഗ്‌നല്‍ സംവിധാനം അന്‍വര്‍സാദത്ത് എം.എല്‍.എ ഉദ്ഘാടനം ചെയ്തു.
ചെങ്ങമനാട് ഗ്രാമ പഞ്ചായത്ത് പ്രസിഡന്റ് പി.ആര്‍.രാജേഷ് അധ്യക്ഷനായിരുന്നു. ജില്ല പഞ്ചായത്തംഗം സരള മോഹനന്‍, നഗരസഭ കൗണ്‍സിലര്‍ ലീന ജോര്‍ജ്, ഗ്രാമ പഞ്ചായത്തംഗങ്ങളായ ദിലീപ് കപ്രശ്ശേരി, ലത ഗംഗാധരന്‍, മുന്‍ ജില്ല പഞ്ചായത്തംഗം എം.ജെ ജോമി, ദാവൂദ് ഖാദര്‍, സമദ് പറമ്പയം, നൗഷാദ് പാറപ്പുറം തുടങ്ങിയവര്‍ സംസാരിച്ചു.