അലനല്ലൂര്‍: വ്യത്യസ്ത നിറത്തിലുള്ള നൂലുകള്‍ കൊണ്ട് ജ്യാമിതീയ രൂപങ്ങള്‍ നിര്‍മിക്കുന്ന ത്രഡ് പാറ്റേണ്‍ മത്സരത്തില്‍ വിസ്മയങ്ങള്‍ തീര്‍ക്കുകയാണ് എടത്തനാട്ടുകര കോട്ടപ്പള്ള 'ഇശല്‍' മന്‍സിലിലെ സഹോദരങ്ങളായ പി. അമന്‍ സലാമും പി. അര്‍ഷ സലാമും. എടത്തനാട്ടുകര മൂച്ചിക്കല്‍ ഗവ.എല്‍.പി. സ്‌കൂളിലെ രണ്ടാം ക്ലാസ് വിദ്യാര്‍ഥിയായ പി. അമന്‍ സലാമും സഹോദരിയും എടത്തനാട്ടുകര നാലുകണ്ടം പി.കെ.എച്ച്.എം.ഒ.യു.പി സ്‌കൂള്‍ ആറാം ക്ലാസ് വിദ്യര്‍ഥിനിയുമായ പി. അര്‍ഷ സലാമും തച്ചമ്പാറയില്‍ നടന്ന ജില്ലാ തല പ്രവര്‍ത്തി പരിചയമേളയില്‍ മികച്ച നേട്ടം കൈവരിച്ചു. എല്‍.പി.വിഭാഗത്തില്‍ അമന്‍ എ ഗ്രേഡോടെ ഒന്നാം സ്ഥാനവും യു. പി. വിഭാഗത്തില്‍ മത്സരിച്ച അര്‍ഷ എ ഗ്രേഡോടെ അഞ്ചാം സ്ഥാനവും കരസ്ഥമാക്കി.