തൃശൂര്‍: കെ.എസ്.ആര്‍.ടി.സി തൃശൂര്‍ ഡിപ്പോയിലെ ജീവനക്കാര്‍ 24 മണിക്കൂര്‍ പണിമുടക്കി. ബുധനാഴ്ച രാത്രി 12 മണി മുതല്‍ ഇന്നലെ രാത്രി 12 മണിവരെയാണ് പണിമുടക്കിയത്. സംയുക്ത തൊഴിലാളി യൂണിയന്റെ ആഭിമുഖ്യത്തില്‍ നടന്ന സമരത്തില്‍ ഡിപ്പോയിലെ മുഴുവന്‍ ഡ്രൈവര്‍മാരും കണ്ടക്ടര്‍മാരും ഓഫീസ് ജീവനക്കാരും പങ്കെടുത്തു. ഡിപ്പോയില്‍ നിന്നുള്ള 93 സര്‍വീസുകളും മുടങ്ങി.
സസ്‌പെന്‍ഡിലായവരെ സര്‍വീസില്‍ തിരിച്ചെടുക്കണമെന്നാവശ്യപ്പെട്ട് ഡിപ്പോയിലെ തൊഴിലാളികള്‍ വിവിധ സമരങ്ങള്‍ നടത്തിവരികയാണ്. പത്ത് ദിവസം മുമ്പ് സമരക്കാര്‍ പണിമുടക്ക് നോട്ടീസ് നല്‍കിയിരുന്നുവെങ്കിലും ഒത്തുതീര്‍പ്പിന് അധികൃതര്‍ ശ്രമിച്ചിരുന്നില്ല. സമരത്തിന് കെ.വി ഡേവി, ടി.ബി വിനോദ് ഖന്ന, ജോബിഷ്.എം.ചാക്കോ, ഡേവിസ്.പി.ജോസ്, പി.എം രാജീവ് തുടങ്ങിയവര്‍ നേതൃത്വം നല്‍കി.