കുട്ടനാട്: ഹൗസ് ബോട്ടിടിച്ച് നെല്ലു കയറ്റിവന്ന വള്ളം മുങ്ങി. വള്ളത്തിലുണ്ടായിരുന്ന തൊഴിലാളികളായ രണ്ടു പേര്‍ നീന്തി രക്ഷപെട്ടു.പള്ളാത്തുരുത്തി പാലത്തിനു കിഴക്കു വശം സെന്റ് തോമസ് പള്ളിയുടെ സമീപത്ത് ഇന്നലെ  പകല്‍ 2.30 ഓടെയാണ് അപകടം ഉണ്ടായത്.
    വള്ളത്തിലുണ്ടായിരുന്ന 125 ക്വിന്റല്‍ നെല്ല് വെള്ളത്തില്‍ മുങ്ങി. പുന്നപ്ര പാരേക്കാട് പാടശേഖരത്തു നിന്നും നെല്ലുമായി പള്ളാത്തുരുത്തിയില്‍ എത്തിയ വള്ളമാണ് ഹൗസ് ബോട്ട് ഇടിച്ച് മുങ്ങിയത്. ഹൗസ് ബോട്ട് പിന്നിലേക്ക് എടുത്തപ്പോള്‍ നെല്ലും വള്ളത്തില്‍ ഇടിക്കുകയായിരുന്നുവെന്ന് വള്ളത്തിലെ തൊഴിലാളികള്‍ പറഞ്ഞു. പള്ളാത്തുരുത്തിയില്‍ ഉണ്ടായിരുന്ന മറ്റു വള്ളങ്ങളിലെ തൊഴിലാളികളും നാട്ടുകാരും ചേര്‍ന്നാണ് വെള്ളത്തില്‍ നിന്നും നെല്ല് കരയ്‌ക്കെത്തിച്ചത്.