ബാലരാമപുരം: കെ.എസ്.ആര്‍.ടി.സി ബസും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു.
ബാലരാമപുരം മുടവൂര്‍പാറ തെറ്റിവിള കിഴക്കുംകര വീട്ടില്‍ സന്തോഷ് (35) ആണ് മരിച്ചത്. തിങ്കളാഴ്ച രാത്രി എട്ട് മണിയോടെ ബാലരാമപുരത്തിനു സമീപം മുടവൂര്‍പാറയിലായിരുന്നു അപകടം. ബാലരാമപുരം ഭാഗത്തുനിന്നും വെടിവച്ചാന്‍കോവില്‍ ഭാഗത്തേയ്ക്ക് പോയ ബൈക്കില്‍ തിരുവനന്തപുരത്തുനിന്നും ബാലരാമപുരം ഭാഗത്തേയ്ക്ക് വരികയായിരുന്ന നെയ്യാറ്റിന്‍കര ഡിപ്പോയുടെ ബസ് ഇടിക്കുകയായിരുന്നു.
ഗുരുതരമായി പരുക്കേറ്റ സന്തോഷിനെ ഉടന്‍ തന്നെ നാട്ടുകാര്‍ നെയ്യാറ്റിന്‍കരയിലുളള സ്വകാര്യ ആശുപത്രിയിലെത്തിച്ചെങ്കിലും രാത്രിയോടെ മരിച്ചു.
ഭാര്യ: ശ്രീദേവി. നാലു വയസുളള ഒരു കുഞ്ഞുണ്ട്. മൃതദേഹം ഇന്നലെ നെയ്യാറ്റിന്‍കര ജനറല്‍ ആശുപത്രിയില്‍ പോസ്റ്റ് മോര്‍ട്ടം ചെയ്ത ശേഷം ബന്ധുക്കള്‍ക്ക് വിട്ടു കൊടുത്തു. ബാലരാമപുരം പൊലീസ് കേസെടുത്തു.