കോഴിക്കോട്: പതിനഞ്ചാമത് റവന്യു ജില്ലാ സ്‌കൂള്‍ കായികമേളയില്‍ നിലവിലെ ചാംപ്യന്മാരായ മുക്കം ഉപജില്ലയ്ക്ക് ഓവറോള്‍ കിരീടം. കഴിഞ്ഞ മൂന്നു ദിവസങ്ങളിലായി മെഡിക്കല്‍ കോളജ് ഒളിംപ്യന്‍ റഹ്മാന്‍ സ്റ്റേഡിയത്തില്‍ നടന്ന കായികമേളയില്‍ പുല്ലൂരാംപാറ സെന്റ് ജോസഫ് എച്ച്.എസാണ് സ്‌കൂളുകളുടെ വിഭാഗത്തില്‍ ഒന്നാമത്. തുടര്‍ച്ചയായി ഏഴാം തവണയാണ് മുക്കം ഉപജില്ല കിരീടം ചൂടുന്നത്. 26 സ്വര്‍ണവും 35 വെള്ളിയും 28 വെങ്കലവും നേടി 292.5 പോയിന്റോടെയാണ് മുക്കം വീണ്ടും കിരീടത്തില്‍ മുത്തമിട്ടത്. ഒന്‍പതു സ്വര്‍ണവും 14 വെള്ളിയും 15 വെങ്കലവുമായി 105.5 പോയിന്റോടെ താമരശ്ശേരി ഉപജില്ല രണ്ടാം സ്ഥാനം കരസ്ഥമാക്കി. എട്ടു സ്വര്‍ണവും 11 വെള്ളിയും ഒന്‍പതു വെങ്കലവുമായി 97 പോയിന്റോടെ കൊയിലാണ്ടി ഉപജില്ലയ്ക്കാണ് മൂന്നാം സ്ഥാനം. 11 സ്വര്‍ണവും ഏഴു വീതം വെള്ളിയും വെങ്കലവുമായി 88 പോയന്റ് നേടിയ ബാലുശ്ശേരി ഉപജില്ല നാലാം സ്ഥാനം നേടി.
17 സ്വര്‍ണവും 20 വെള്ളിയും എട്ടു വെങ്കലവും നേടി 149.5 പോയിന്റോടെയാണ് സെന്റ് ജോസഫ് എച്ച്.എസ് പുല്ലൂരാംപാറ സ്‌കൂള്‍ വിഭാഗത്തില്‍ ചാംപ്യന്മാരായത്. എട്ടു സ്വര്‍ണവും ആറു വെള്ളിയും നാലു വെങ്കലവുമായി 62 പോയിന്റ് നേടിയ ഉഷ സ്‌കൂളിന്റെ കരുത്തിലാണ് പൂവമ്പായി എ.എം.എച്ച്.എസ് രണ്ടാം സ്ഥാനം നേടിയത്. 11 സ്വര്‍ണവും രണ്ടു വെങ്കലവുമായി 61 പോയിന്റ് നേടിയ കുളത്തുവയല്‍ സെന്റ് ജോര്‍ജ്‌സ് എച്ച്.എസ്.എസിന് ഒരു പോയിന്റ് വ്യത്യാസത്തിലാണ് രണ്ടാം സ്ഥാനം നഷ്ടമായത്. ഒന്‍പതു സ്വര്‍ണവും മൂന്നു വെള്ളിയും ആറു വെങ്കലവുമായി 50 പോയിന്റ് നേടിയ കട്ടിപ്പാറ ഹോളി ഫാമിലി എച്ച്.എസിനാണ് നാലാം സ്ഥാനം. രണ്ടു സ്വര്‍ണവും ആറു വെള്ളിയും ആറു വെങ്കലുമായി 34 പോയിന്റോടെ മുക്കം എം.കെ.എച്ച്.എം.എം.ഒ. വി.എച്ച്.എസ്.എസ് അഞ്ചാം സ്ഥാനം നേടി. 30 പോയിന്റോടെ ചാത്തമംഗലം ആര്‍.ഇ.സി ജി.വി.എച്ച്.എസ്.എസ് ആറാം സ്ഥാനവും 29 പോയിന്റോടെ പൊയില്‍കാവ് എച്ച്.എസ് ഏഴാം സ്ഥാനവും നേടി.
സമാപന ചടങ്ങ് കോഴിക്കോട് കോര്‍പറേഷന്‍ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ എം. രാധാകൃഷ്ണന്‍ ഉദ്ഘാടനം ചെയ്തു. ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ മുക്കം മുഹമ്മദ് വിജയികള്‍ക്ക് ട്രോഫികള്‍ വിതരണം ചെയ്തു.