കാസര്‍കോട്: ജില്ലാ സ്‌കൂള്‍ കായിക മേളയിലെ ട്രാക്ക്-ഫീല്‍ഡ് മത്സരങ്ങള്‍ക്കു ഇന്നു തുടക്കമാവും. കൊളിയടുക്കം രാജീവ് ഗാന്ധി സ്റ്റേഡിയത്തില്‍ ഇന്നലെ സമാപിച്ച ക്രോസ് കണ്‍ട്രി മത്സരത്തില്‍ പെണ്‍കുട്ടികളുടെ വിഭാഗം പി അശ്വതി (ജി.എച്ച്.എസ്.എസ് കക്കാട്), കെ.എം കൃഷ്ണാഞ്ജന(ജി.എച്ച്.എസ്.എസ് പെരിയ), പി നന്ദന (ജി.എച്ച്.എസ്.എസ് ചീമേനി) എന്നിവരും ആണ്‍കുട്ടികളുടെ വിഭാഗത്തില്‍ എം സജീര്‍ (ജി.എച്ച്.എസ്.എസ് ചീമേനി), കെ.എം സുധീഷ് (ജി.വി.എച്ച്.എസ്.എസ് കയ്യൂര്‍), പി വിനു പ്രസാദ് (ജി.എച്ച്.എസ്.എസ് പെരിയ) യഥാക്രമം ഒന്നും രണ്ടും മൂന്നും സ്ഥാനം നേടി.
ഇന്നും നാളെയുമായി നടക്കുന്ന ചാംപ്യന്‍ഷിപ്പില്‍ ഏഴു ഉപജില്ലകളില്‍ നിന്നു 95 ഇനങ്ങളിലായി രണ്ടായിരത്തോളം മത്സരാര്‍ഥികള്‍ പങ്കെടുക്കും. അധ്യാപകര്‍ക്കായി 16 ഇനങ്ങളില്‍ മത്സരം സംഘടിപ്പിക്കും. ഇന്നു രാവിലെ 8.30നു ഡി.ഡി.ഇ യു കരുണാകരന്‍ പതാക ഉയര്‍ത്തും. ട്രാക്ക്-ഫീല്‍ഡ് മത്സരങ്ങള്‍ക്കു രാവിലെ 10.30നു തുടക്കമാവും. അത്‌ലറ്റിക് ചാംപ്യന്‍ഷിപ്പ് കെ കുഞ്ഞിരാമന്‍ എം.എല്‍.എ ഉദ്ഘാടനം ചെയ്യും.
ജില്ലാ പഞ്ചായത്ത് വൈസ് പ്രസിഡന്റ് ശാന്തമ്മ ഫിലിപ്പ് അധ്യക്ഷയാകും. നാളെ നടക്കുന്ന സമാപനച്ചടങ്ങില്‍ ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ സമ്മാന ദാനം നിര്‍വഹിക്കും.