ദുബൈ: ദുബൈയില്‍ വെച്ച് നടക്കുന്ന ചാമ്പ്യന്‍സ് ട്രോഫി മത്സരങ്ങള്‍ക്കുള്ള കൂടുതല്‍ ടിക്കറ്റുകള്‍ ലഭ്യമാകുമെന്ന് ഐസിസി പ്രഖ്യാപിച്ചതോടെ പുതിയ ടിക്കറ്റുകള്‍ ഞായറാഴ്ച വില്‍പ്പനയ്‌ക്കെത്തും.

ഇന്ത്യ കളിക്കുന്ന മൂന്ന് ഗ്രൂപ്പ് മത്സരങ്ങള്‍ക്കും ആദ്യ സെമി ഫൈനലിനും അധിക ടിക്കറ്റുകള്‍ ലഭ്യമാക്കും. ഫെബ്രുവരി 16 ഞായറാഴ്ച ഉച്ചയ്ക്ക് 12 മണി മുതലാണ് ഇവ വില്‍പ്പനയ്‌ക്കെത്തുക. ഫെബ്രുവരി 20 ന് ബംഗ്ലാദേശിനെതിരെ നടക്കുന്ന ഇന്ത്യയുടെ ആദ്യ ഗ്രൂപ്പ് മത്സരത്തിനുള്ള ടിക്കറ്റുകളും ലഭ്യമാകും. എട്ട് ടീമുകള്‍ പങ്കെടുക്കുന്ന ടൂര്‍ണമെന്റില്‍ ചിരവൈരികളായ പാകിസ്ഥാനെതിരെയും (ഫെബ്രുവരി 23) ന്യൂസിലന്‍ഡിനെതിരെയും (മാര്‍ച്ച് 2) നടക്കുന്ന മത്സരങ്ങള്‍ക്കുള്ള ടിക്കറ്റുകളും ലഭ്യമാകും.

മാര്‍ച്ച് 4 ചൊവ്വാഴ്ച ദുബൈ ഇന്റര്‍നാഷണല്‍ ക്രിക്കറ്റ് സ്റ്റേഡിയത്തില്‍ നടക്കുന്ന ഒന്നാം സെമി ഫൈനലിന് പരിമിതമായ ടിക്കറ്റുകള്‍ മാത്രമേ ലഭ്യമാകൂ. മാര്‍ച്ച് 9 ഞായറാഴ്ച നടക്കുന്ന ഐസിസി പുരുഷ ചാമ്പ്യന്‍സ് ട്രോഫി ഫൈനല്‍ ടിക്കറ്റുകള്‍ ദുബൈയില്‍ നടക്കുന്ന ആദ്യ സെമിഫൈനല്‍ അവസാനിച്ചതിന് ശേഷമേ ലഭ്യമാകൂ.

Champions League Trophy; More tickets for India's matches in Dubai on sale today