പുല്‍പ്പള്ളി: പാടിച്ചിറ ഗവ. ആശുപത്രിയുടെ പേരില്‍ ജനപ്രതിനിധികള്‍ നല്കിയ ഉറപ്പുകള്‍ പാഴ്‌വാക്കായി. കര്‍ണാടക അതിര്‍ത്തിയോട് ചേര്‍ന്ന മുള്ളന്‍കൊല്ലി പഞ്ചായത്തിലെ ഏക ആരോഗ്യ കേന്ദ്രത്തില്‍ കിടത്തിചികിത്സയൊരുക്കാന്‍ അധികൃതര്‍ തയ്യാറായിട്ടില്ല. കിടത്തിചികിത്സയ്ക്കുള്ള വാര്‍ഡുകളും ആവശ്യമായ ജീവനക്കാരുണ്ടായിട്ടും ആശുപത്രിയില്‍ കിടത്തിചികിത്സ ആരംഭിച്ചിട്ടില്ല. ഡോക്ടര്‍മാര്‍ക്ക് താമിസിക്കാനുള്ള ക്വാര്‍ട്ടേഴ്‌സും മറ്റ് അടിസ്ഥാന സൗകര്യങ്ങളും ഉണ്ടായിട്ടും ആശുപത്രിയെ അവഗണിക്കുകയാണ്.
മുള്ളന്‍കൊല്ലി പഞ്ചായത്തിലെ ഏക ആരോഗ്യകേന്ദ്രമായിട്ടുപോലും ആവശ്യമായ ചികിത്സ സൗകര്യമൊരുക്കാന്‍ അധികൃതര്‍ തയ്യാറാകുന്നില്ല. ആദിവാസി വിഭാഗങ്ങള്‍ ഏറെയുള്ള പ്രദേശമായിട്ടുപോലും മതിയായ ചികിത്സയൊരുക്കുന്നതിന് അലംഭാവം കാണിക്കുകയാണെന്നും നാട്ടുകാര്‍ക്ക് പരാതിയുണ്ട്.
ചെറിയൊരു അസുഖം ഉണ്ടായാല്‍ പോലും മുള്ളന്‍കൊല്ലി പഞ്ചായത്തിലെ അതിര്‍ത്തി ഗ്രാമങ്ങളിലുള്ള സീതാമൗണ്ട്, മരക്കടവ്, കൊളവള്ളി പെരിക്കല്ലൂര്‍ തുടങ്ങിയ പ്രദേശങ്ങളിലുള്ളവര്‍ 15 കിലോമീറ്റര്‍ അകലെയുള്ള പുല്‍പ്പള്ളിയില്‍ എത്തേണ്ട അവസ്ഥയാണ്.
ലക്ഷങ്ങള്‍ മുടക്കി കെട്ടിടം നിര്‍മിച്ചെങ്കിലും കിടത്തി ചികിത്സയൊരുക്കാന്‍ അരോഗ്യവകുപ്പ് നടപടി സ്വീകരിക്കുന്നില്ല. ആവശ്യമായ ഡോക്ടര്‍മാരെ നിയമിച്ച് കിടത്തി ചികിത്സ ആരംഭിക്കാനുള്ള നടപടി സ്വീകരിക്കണമെന്നാമ് ജനങ്ങളുടെ ആവശ്യം.