ഗുരുവായൂര്‍: കൂനംമൂച്ചി സെന്റ് തോമസ് യുപി സ്‌കൂളില്‍ മോഷണം.സ്‌കൂള്‍ ആവശ്യങ്ങള്‍ക്കായി പിടിഎ കമ്മിറ്റി വാങ്ങിവെച്ചിരുന്ന കാമറ നഷ്ടപ്പെട്ടു. സ്‌കൂളിലെ ഓഫിസ് റൂമിന്റേയും സ്റ്റാഫ് റൂമിന്റേയും വാതില്‍ തകര്‍ത്താണ് മോഷ്ടാവ് അകത്ത് കടന്നിട്ടുള്ളത്. മുകള്‍ നിലയിലേക്ക് കയറുന്ന ഷട്ടറിന്റെ പൂട്ടും തകര്‍ത്തിട്ടുണ്ട്. ഇന്നലെ രാവിലെ കലാമേളയ്ക്ക് പോകുന്നതിനായി അധ്യാപകരെത്തിയപ്പോഴാണ് മോഷണം അറിയുന്നത്. ഓഫിസ് റൂമിന്റെ ജനലുകളും തകര്‍ത്തിട്ടുണ്ട്. മോഷണം പോയ കാമറയ്ക്ക് ഏഴായിരം രൂപ വിലവരുമെന്ന് അധ്യാപകര്‍ പറഞ്ഞു. വാതില്‍ പൊളിയ്ക്കാന്‍ ഉപയോഗിച്ചതെന്ന് സംശയിക്കുന്ന കമ്പിപ്പാര സംഭവസ്ഥലത്തു നിന്നും കണ്ടെടുത്തിട്ടുണ്ട്. സ്‌കൂള്‍ മാനേജര്‍ ഫാ.ജോണ്‍ കിടങ്ങന്‍ പൊലിസില്‍ പരാതി നല്‍കി. ഗുരുവായൂര്‍ പൊലിസ് സ്ഥലത്തെത്തി അന്വേഷണം ആരംഭിച്ചു.