കട്ടക്ക്: ത്രിപുരയ്‌ക്കെതിരായ രഞ്ജി ട്രോഫിയില്‍ കേരളം ഒന്നാം ഇന്നിങ്‌സില്‍ 20 റണ്‍സിന്റെ വിലപ്പെട്ട ലീഡ് വഴങ്ങി. ആദ്യ ഇന്നിങ്‌സില്‍ ത്രിപുരയെ 213 റണ്‍സില്‍ ഒതുക്കാന്‍ കേരളത്തിനായെങ്കിലും ഒന്നാം ഇന്നിങ്‌സില്‍ കേരളത്തെ 193 റണ്‍സില്‍ പുറത്താക്കിയാണ് ത്രിപുര കരുത്തു കാട്ടിയത്. രണ്ടാം ഇന്നിങ്‌സ് തുടങ്ങിയ ത്രിപുര വിക്കറ്റ് നഷ്ടമില്ലാതെ 17 റണ്‍സെന്ന നിലയില്‍ രണ്ടാം ദിനം അവസാനിപ്പിച്ചു. 13 റണ്‍സുമായി യു.യു ബോസും നാലു റണ്‍സുമായി ബി.ബി ഘോഷുമാണ് ക്രീസില്‍. പത്തു വിക്കറ്റുകള്‍ ശേഷിക്കെ അവര്‍ക്ക് 37 റണ്‍സ് ലീഡ്.
നേരത്തെ നാലു വീതം വിക്കറ്റുകള്‍ വീഴ്ത്തിയ മുര സിങ്, മജുംദാര്‍ എന്നിവരുടെ ബൗളിങാണ് കേരളത്തെ തകര്‍ത്തത്. വിക്കറ്റ് നഷ്ടമില്ലാതെ 11 റണ്‍സുമായി രണ്ടാം ദിനം തുടങ്ങിയ കേരളത്തിനു കൃത്യമായ ഇടവേളകളില്‍ വിക്കറ്റുകള്‍ നഷ്ടമായി. 40 റണ്‍സെടുത്ത മുഹമ്മദ് അസ്ഹറുദ്ദീനാണ് ടോപ് സ്‌കോറര്‍. 36 റണ്‍സുമായി അക്ഷയ് ചന്ദ്രന്‍ പുറത്താകാതെ നിന്നു. സച്ചിന്‍ ബേബി (29), സല്‍മാന്‍ നിസാര്‍ (25) എന്നിവരും പിടിച്ചു നിന്നു.