കൊല്ലം: അഭിഭാഷകരും മാധ്യമപ്രവര്‍ത്തകരും തമ്മിലുണ്ടായ സംഘര്‍ഷത്തിന്റെ തുടക്കം ഒരു അഭിഭാഷകന്‍ നടത്തിയ സ്ത്രീപീഡനവും അത് വാര്‍ത്തയായതുമായിരുന്നുവെന്നത് അഭിഭാഷകര്‍ മറക്കരുതെന്ന് സാഹിത്യകാരി കെ. ആര്‍ .മീര.  
പുത്തൂര്‍ ഗോപാലകൃഷ്ണന്‍ അനുസ്മരണ ചടങ്ങില്‍ 'സ്ത്രീ സുരക്ഷ' എന്ന വിഷയത്തില്‍ പ്രഭാഷണം നടത്തുകയായിരുന്നു അവര്‍. ഹൈക്കോടതി ജഡ്ജിമാരായ ജസ്റ്റിസ് ബി കമാല്‍പാഷ, ജസ്റ്റിസ് പി ബി സുരേഷ് കുമാര്‍ എന്നിവരുടെ സാനിധ്യത്തിലായിരുന്നു കെ .ആര്‍. മീരയുടെ പരാമര്‍ശം. കൈയില്‍ ബ്ലേഡും കുരുമുളക് പൊടിയുമായി സ്വന്തം നാട്ടില്‍ സ്ത്രീക്കു യാത്രചെയ്യേണ്ടി വരുന്നത് അപമാനമാണ്. ഇതിനെതിരേ സമൂഹത്തിന്റെ ചെറുത്തുനില്‍പ്പ് തുടങ്ങേണ്ടത് വീടുകളില്‍ നിന്നു തന്നെയാണെന്നും അവര്‍  പറഞ്ഞു. അനുസ്മരണ സമ്മേളനം ജസ്റ്റിസ് കമാല്‍ പാഷ ഉദ്ഘാടനം ചെയ്തു.  അഭിഭാഷകന്‍ എന്നതിലുപരി നല്ല വ്യക്തിയായിരുന്നു പുത്തൂര്‍ ഗോപാലകൃഷ്ണന്‍എന്ന് ഹൈക്കോടതി ജസ്റ്റിസ് പി .ബി .സുരേഷ് കുമാര്‍ പറഞ്ഞു. കെ .ജി. പ്രസന്നരാജന്‍ സംസാരിച്ചു.