മട്ടന്നൂര്‍: മട്ടന്നൂര്‍ ഹൈസ്‌കൂളി നു സമീപം വന്‍ ലഹരി വേട്ട. വാഹന പരിശോധനക്കിടെയാണ് കാറില്‍ കടത്തുകയായിരുന്ന ചരസ്, കൊക്കെയ്ന്‍ എന്നിവ സഹിതം ചക്കരക്കല്ല് സ്വദേശികളായ മേച്ചേരിയിലെ എ മിദിലാജ്(23), ഷാഫിഖ്(26), മാഹി സ്വദേശി മുനീര്‍ (27) എന്നിവരം ഒരു യുവതിയും പിടിയിലായത്. ഇവര്‍ സഞ്ചരിച്ച കാറും കസ്റ്റഡിയിലെടുത്തു. ഇന്നലെ പുലര്‍ച്ചെയാണ് മട്ടന്നൂര്‍ എസ്.ഐ എം.പി.ഐ വിനീഷുംസംഘവും വാഹന പരിശോധന നടത്തിയത്. 120 ഗ്രാം മയക്കുമരുന്ന് വില്‍പ്പനക്കായി കൊണ്ടു പോകുന്നതിനിടെയാണ് ഇവര്‍ പിടിയിലായത്.
ഹിമാചല്‍പ്രദേശില്‍ നിന്നാണ് ചരസും കൊക്കെയ്‌നും വാങ്ങിയതെന്നും തൃശൂരിലേക്കു വില്‍പ്പനയ്ക്ക് കൊണ്ടു പോകുന്നതാണെന്നും ഇവര്‍ പൊലിസിനോടു പറഞ്ഞു. അഞ്ചുലക്ഷം രൂപ വിലവരും. ജില്ലയില്‍ മയക്കുമരുന്ന് വില്‍പ്പന നടത്തുന്ന പ്രധാന സംഘമാണ് ഇവരെന്നു സംശയിക്കുന്നു. യുവതിയെ മുന്‍നിര്‍ത്തിയാണ് വില്‍പ്പനയെന്നു പൊലിസ് പറയുന്നു. ബംഗളൂരുവില്‍ നിന്നാണ് ലഹരി വസ്തുക്കള്‍ ലഭിക്കുന്നതെന്നു പിടിയിലായവര്‍ പൊലിസിനുമൊഴി നല്‍കിയിട്ടുണ്ട്. പ്രതികളെ വടകര നര്‍കോട്ടിക് കോടതില്‍ ഹാജരാക്കി.