തളിപ്പറമ്പ്: നിരവധി രക്ഷിതാക്കളും അധ്യാപകരും തളിപ്പറമ്പ് നോര്‍ത്ത്, സൗത്ത് ഉപജില്ലാ സ്‌കൂള്‍ കലോത്സവ അപ്പീല്‍ തീരുമാനങ്ങള്‍ക്കെതിരേ പരസ്യമായി രംഗത്തിറങ്ങി. അപ്പീലുകളുടെ പരിഗണനയില്‍ തളിപ്പറമ്പ് ജില്ലാ വിദ്യാഭ്യാസ ഓഫിസ് പരിധിയില്‍ ഭരണകക്ഷിയില്‍ പെട്ട ഒരു അധ്യാപക സംഘടനയുടെ ഇടപെടലാണ് അര്‍ഹതപ്പെട്ടവര്‍ പുറത്താകാന്‍ കാരണമായതെന്നാണു വ്യാപക പരാതി. ഇന്ന് ആരംഭിക്കുന്ന ജില്ലാ കലോത്സവത്തില്‍ പങ്കെടുക്കാന്‍ അര്‍ഹത നേടുന്നതിന് കോടതിയെ സമീപിക്കാനുള്ള ഒരുക്കത്തിലാണ് പലരും. കഴിഞ്ഞ 3, 4 തിയതികളിലാണ് ഡി.ഇ.ഒ ഓഫിസില്‍ അപ്പീലുകള്‍ പരിഗണിച്ചത്. 1000 രൂപ ഫീസടച്ച് 106 പേരാണ് അപ്പീല്‍ നല്‍കിയിരുന്നത്. ഇതില്‍ 31 എണ്ണം മാത്രമാണ് അംഗീകരിച്ചത്. ബാക്കി 75 എണ്ണവും തള്ളപ്പെട്ടു. ഇതില്‍ നിന്നു 75,000 രൂപയാണ് വിദ്യാഭ്യാസ വകുപ്പിനു ലഭിച്ചത്. മൂത്തേടത്ത് ഹൈസ്‌കൂളിലെ ആര്‍ഷല്‍ ഐസക് തോമസ് എന്ന വിദ്യാര്‍ഥി മലയാളം ഉപന്യാസത്തിലാണ് അപ്പീല്‍ സമര്‍പ്പിച്ചത്.
എന്നാല്‍ സംസ്ഥാന ശാസ്ത്രമേളയില്‍ ഉള്‍പ്പെടെ നിരവധി ഉപന്യാസ-ക്വിസ് മത്സരങ്ങളില്‍ ഒന്നാം സ്ഥാനം നേടിയ ഈ വിദ്യാര്‍ഥിയുടെ അപ്പീല്‍ ജഡ്ജിങ്ങ് കമ്മറ്റി അനുകൂലിച്ചിട്ടും തള്ളിയെന്നാണ് ആക്ഷേപം. അതേ അവസരം അധ്യാപക സംഘടനയുടെ ജില്ലാ-സംസ്ഥാനനേതാക്കള്‍ ശുപാര്‍ശ ചെയ്ത പലരും അപ്പീലില്‍ കയറിക്കൂടിയെന്നും ആരോപണമുണ്ട്. കരിവെള്ളൂരിലെ എ.വി സ്മാരക ഹയര്‍ സെക്കന്‍ഡറിയില്‍ ഹയര്‍ സെക്കന്‍ഡറി പദ്യം ചൊല്ലല്‍, ഹൈസ്‌കൂള്‍ ലളിതഗാനം, ഹയര്‍സെക്കന്‍ഡറി ശാസ്ത്രീയ സംഗീതം, ഹയര്‍സെക്കന്‍ഡറി ഹിന്ദി ഉപന്യാസം എന്നിവയില്‍ അപ്പീല്‍ അനുവദിച്ചിരുന്നു. യാതൊരു മാനദണ്ഡവും പരിഗണിക്കാതെയാണ് ഈ അപ്പീലുകള്‍ അംഗീകരിച്ചതെന്നാണ് അപ്പീല്‍ നിരസിക്കപ്പെട്ടവര്‍ ആരോപിക്കുന്നത്. ഇതിനെതിരേ കോടതിയെ സമീപിക്കുമെന്നും ഇവര്‍ പറഞ്ഞു. ഇന്നലെ ഉച്ചകഴിഞ്ഞാണ് അപ്പീല്‍ സംബന്ധിച്ച വിവരങ്ങള്‍ പ്രസിദ്ധീകരിച്ചത്. തികച്ചും അര്‍ഹത മാത്രം നോക്കിയാണ് അപ്പീലുകള്‍ പരിഗണിച്ചതെന്നും ഇടപെടലുകളൊന്നും നടന്നിട്ടില്ലെന്നും ഡി.ഇ.ഒ ബാലചന്ദ്രന്‍ മഠത്തില്‍ പറഞ്ഞു.