തേഞ്ഞിപ്പലം: 60ാമത് സംസ്ഥാന സ്‌കൂള്‍ കായിക മേള സമാപനത്തോടടുക്കുമ്പോള്‍ എറണാകുളത്തിന്റെ കുത്തക തകര്‍ക്കാന്‍ ആര്‍ക്കുമായില്ല. പോയിന്റ് പട്ടികയില്‍ അതിവേഗം മുന്നേറുന്ന എറണാകുളത്തിന് വെല്ലുവിളിയായി ഒരു വേള പാലക്കാട് വന്നെങ്കിലും ഇപ്പോള്‍ പാലക്കാടിനെ പിന്തള്ളി എറണാകുളം കിരീടമുറപ്പിച്ചിരിക്കുകയാണ്. കായിക മേള സമാപിക്കാന്‍ മണിക്കൂറുകള്‍ മാത്രം ബാക്കി നില്‍ക്കേ ആകെയുള്ള 95 ഇനങ്ങളില്‍ 80 ഇനങ്ങള്‍ പൂര്‍ത്തിയായപ്പോള്‍ 221 പോയിന്റുമായി എറണാകുളം ഒന്നാം സ്ഥാനത്തും 206 പോയിന്റുമായി പാലക്കാട് രണ്ടാം സ്ഥാനത്തുമാണ്. 76 പോയിന്റുമായി കോഴിക്കോടാണ് മൂന്നാം സ്ഥാനത്തുള്ളത്.

സ്‌കൂളുകളുടെ വിഭാഗത്തില്‍ 109 പോയിന്റുമായി എറണാകുളം കോതമംഗലം മാര്‍ബേസില്‍ എച്ച്.എസ്.എസ് തന്നെയാണ് മുന്നിലുള്ളത്. 81 പോയിന്റുമായി കെ.എച്ച്.എസ് കുമരപത്തൂരാണ് രണ്ടാം സ്ഥാനത്തുള്ളത്. 47 പോയിന്റുമായി കോതമംഗലം സെന്റ് ജോര്‍ജ് എച്ച്.എസ്.എസ് മൂന്നാം സ്ഥാനത്താണ്.
കാലിക്കറ്റ് സര്‍വകലാശാലയിലെ സി.എച്ച് മുഹമ്മദ്‌കോയ സ്‌റ്റേഡിയത്തില്‍ നടക്കുന്ന മേള ഇന്ന് വൈകീട്ട് അഞ്ചോടെ സമാപിക്കും.